शारीरिक सम्बन्ध राख्दा पिसाब लागेको अनुभव किन हुन्छ ?

शारीरिक सम्बन्ध कायम राख्ने क्रममा पिसाब लागेको अनुभव भयो भने त्यो पलको मिठास खल्लो हुन्छ । पिसाब आएर पटक-पटक बाथरुम जाँदा कतिपयलाई यौनक्रियामै रुचि नहुन सक्छ । कतिपय यही कारणले निराश हुन्छन् ।

यो समस्याको समाधान छ । तर यसलाई समस्या मानेर चिकित्सकलाई भेट्न संकोच मान्दा यौन जीवन नै तहसनहस हुनसक्छ ।

कति साझा समस्या ?

यौनक्रियाको समयमा पिसाब आउने समस्या साझा समस्या हो । जुन तुलनात्मक रूपमा महिलामा देखिन्छ । किनकि पुरुषमा पिसाब होस् वा यौनक्रियामा निस्कने सेमेन स्वनियन्त्रण गर्ने क्षमता हुन्छ, जुन महिलामा हुँदैन ।

६० प्रतिशत महिलाले यौन सम्बन्ध राख्ने क्रममा पिसाब लागेको महसुस गर्छन् ।

कारण

प्राय: पेल्भिकको मांसपेशी कमजोर भएमा पिसाब लाग्ने वा चुहिन सक्छ । यस्तो अवस्थामा महिलामा तीव्र रुपले उत्तेजना हुँदा मूत्रथैली वा मूत्रनलीमा दबाब पर्न सक्छ । जसले पिसाब लागेको अनुभूति गराउँछ । तर यो सबै महिलामा नहुन सक्छ ।

विशेषगरी प्राकृतिक तरिकाबाट एक भन्दा बढी बच्चा जन्माइसकी महिलाको पेल्भिक मांसपेशी कमजोर हुन्छ । किनकि प्रसवको बेलामा मांसपेशी तन्किएर खुकुलो भई थोरै दबाबले पनि पिसाब लागेको अनुभव हुनसक्छ । उनीहरुमा यो क्रममा हाच्छ्यूँ गर्दा र खोक्दा पनि पिसाब चुहिन सक्छ ।

पिसा चुहिनु वा आएको अनुभव हुनु भनेको मूत्रथैली अति सक्रिय भएको लक्षण पनि हो । कतिपय अवस्थामा महिला यौनको चरमोत्कर्षमा पुग्दा पनि पिसाब लागेको अनुभव हुनसक्छ । त्यो स्राव पिसाब नभएर दूध जस्तो देखिने तरल पदार्थ हुनसक्छ, जुन आउनु स्वभाविक र सामान्य हो ।

मदिरा र क्याफिन बढी सेवन

यदि यौनक्रिया गर्नु केही समयअघि मदिरा र क्याफिन बढी सेवन गरेको खण्डमा पनि शारीरिक सम्पर्क गर्दा पिसाब पटक-पटक लाग्न सक्छ ।

रजोनिवृत्ति  

रजोनिवृत्ति हुन लागेको महिलामा पनि पेटको तल्लो भागको मांसपेशी कमजोर हुँदै जान्छ । जसकारण हाच्छयूँ गर्दा, खोक्दा, हाँस्दा र शारीरिक सम्पर्क गर्दा पनि दबाबका कारण पिसाब चुहिन सक्छ ।

पिसाब संक्रमण

महिलामा पिसाब संक्रमण भएमा पनि मूत्रथैली अति सक्रिय हुन्छ । जसले पटक-पटक पिसाब लागेको अनुभव हुन्छ । शारीरिक सम्बन्ध राख्दा पनि यो समस्या देखिन सक्छ ।

के छ उपचार ?

यदि यस्तो समस्या छ भने चिकित्सकलाई भेट्नैपर्छ । चिकित्सकले योसँगै अरु पनि लक्षण भए नभएको यकिन गरी समस्या पत्ता लगाउँछन् । यदि पिसाब संक्रमण भएको छ भने औषधि उपचार गरेमा निको हुन्छ ।

मांसपेशी कमजोर भएमा पिसाब नियन्त्रण राख्ने ब्ल्याडर तालिम लिन सल्लाह दिइन्छ । सो तालिममा तीव्र पिसाब गर्न मन लाग्ने अवस्थामा नियन्त्रण ल्याउन सिकाइन्छ । विभिन्न योगासन र व्यायामले पनि मांसपेशी कसिलो पारी मूत्राशयको कार्य बलियो बनाउन मद्दत गर्छ ।

कतिपय अवस्थामा भने औषधि नै चलाउनुपर्ने हुनसक्छ ।

घरमै गर्न सकिने केही अभ्यास

केगल व्यायाम

यदि यौन क्रियाकलापको क्रममा पिसाब रसाउने समस्या छ भने केगल व्यायाम गर्न सकिन्छ । यो व्यायामले पेल्भिक मांसपेशीलाई बलियो बनाउँछ, जसले गर्दा चुहावटको समस्याबाट बच्न सकिन्छ ।

पिसाब गर्नुअघि मूत्राशय खाली गर्ने

पिसाब आइराख्ने बानीले हैरान पार्छ भने यौनक्रिया गर्नुअघि पिसाब गरेर मात्र बेडमा जाने गर्नु उपयुक्त हुन्छ ।

यौनक्रिया गर्नुअघि तरल पदार्थ सेवन नगर्ने

यौन क्रियाकलापमा भाग लिनुअघि तुरुन्तै पानी वा अन्य तरल पदार्थ पिउनबाट जोगिनुपर्छ । पानी मात्र नभई क्याफिनयुक्त पेय पदार्थ, विशेषगरी मदिरा पनि खानुहुँदैन । नत्र पिसाब फेर्ने इच्छा भइरहन्छ ।

यो पनि पढ्नुहोस

‘नेपालमा यौन समस्याबारे छलफल हुँदैन, यसले सम्बन्ध बिगार्न सक्छ’

यो पनि पढ्नुहोस

समाजमा यौन शिक्षाबारे खुला बहस किन अपरिहार्य छ ?

– यस समाचारको श्रोत : Online Khabar हो ।