तीन वटा निर्जीवन बीमा कम्पनीलाई प्राधिकरणले गर्यो कारबाही
१७ पुस, काठमाडौं । नेपाली बीमा प्राधिकरणले तीन वटा बीमा कम्पनीलाई कारबाही गरेको छ । ६ पुसमा बसेको नेपाल बीमा प्राधिकरण सञ्चालक समितिको बैठकले तीन वटा निर्जीवन बीमा कम्पनीलाई नगद जरीवाना सहित कारबाही गरेको बीमा प्राधिकरणको प्रवक्ता तथा कार्यकारी निर्देशक राजुरमण पौडेलले बताए ।
आईजीआई प्रुडेन्सियल इन्स्योरेन्स, युनाइटेड अजोड इन्स्योरेन्स र राष्ट्रिय बीमा कम्पनीलाई समान २ लाख रुपैयाँ नगद जरिवाना सहित कारबाही भएको उनले बताए ।
‘प्राधिकरणले गरेको स्थलगत निरीक्षणका क्रममा देखिएको कैफियतहरु र पटक पटकको स्पष्टीकरणपछि ३ वटा निर्जीवन बीमा कम्पनीलाई कारावही भएको हो,’ कार्यकारी निर्देशक पौडेलले भने, ‘बीमा कम्पनकिो संस्थागत सशासन बढाउन बीमा कम्पनीको स्थलगत सुपरिवेक्षणमा देखिएको कैफियतको आधारमा यसअघि पनि सिद्धार्थ प्रिमियर इन्स्योरेन्स कम्पनीलाई २ लाख नगद जरिवाना सहति कारबाही भएको थियो ।’
प्राधिकरण बीमा प्रवर्द्धनसँगै सुपरिवेक्षणमा पनि कडाइका साथ प्रस्तुत हुने उनले बताए । स्थलगत निरीक्षणका क्रममा अधिकांश बीमा कम्पनीहरुले उधारो बीमा गराएको, रेट कटिङ गरेको, आम्दानीको स्रोत नखुलाई बीमा गरेर सम्पत्ति शुद्धीकरणमा ध्यान नदिएको, दाबी भुक्तानीमा समस्या पाइएको जस्ता कैफियत भेटिएको प्राधिकरणले जनाएको छ ।
चालु आर्थिक वर्षको साउनदेखि कात्तिकसम्म भएको स्थलगत सुपरिवेक्षणको आधारमा ४ वटा कम्पनीलाई कारबाही भएको प्राधिकरण स्रोतले जनाएको छ ।
– यस समाचारको श्रोत : Online Khabar हो ।