६ महिनामा देशभरि थपियो ११७ किलोमिटर मात्र पक्की सडक
२४ फागुन, काठमाडौं । नेपालमा आर्थिक वर्ष २०८०/८१ को पहिलो ६ महिनाको अवधिमा ११७ किलोमिटर मात्र पक्की सडक थप भएको छ ।
सरकारको तथ्यांक अनुसार साउनदेखि पुस मसान्तसम्म ९३ किलोमिटर दुई लेन कालोपत्रे सडक थप भएको छ ।
यस अवधिमा २४ किलोमिटर चार लेन सडक कालोपत्रे भएको छ । जसबाट कुल ११ठ किलोमिटर सडक मात्र ६ महिनामा थप भएको प्रधानमन्त्री तथा मन्त्रीपरिषद् कार्यालयको एकीकृत अनुगमन प्रणालीले तयार पारेको प्रतिवेदनमा उल्लेख छ ।
असार मसान्तसम्म देशभरि १७ हजार ६९२ किलोमिटर दुई लेन सडक कालोपत्रे रहेको थियो । पुस मसान्तसम्म १७ हजार ७८५ किलोमिटर मात्र दुई लेन कालोपत्रे सडक पुगेको छ ।
चार लेनतर्फ असार मसान्तसम्म १४४ किलोमिटर कालोपत्रे रहेकामा अहिले १६८ किलोमिटर पुगेको छ ।
सरकारले चालु आर्थिक वर्ष २०८०/८१ भित्र कुल ८ सय किलोमिटर दुई लेन सडक कालोपत्रे गर्ने लक्ष्य लिएको छ ।
यस वर्ष चारलेन सडक १५० किलोमिटर थप गर्ने लक्ष्य सरकारको छ । तर, पहिलो ६ महिनाको तथ्यांकले सो लक्ष्य भेट्न निकै कठिन हुने देखिएको छ ।
– यस समाचारको श्रोत : Online Khabar हो ।