कमला–ढल्केबर–बागमती सडक विस्तार गर्न ठेक्का आह्वान
१२ चैत, काठमाडौं । महेन्द्र राजमार्ग अन्तर्गत कमला–ढल्केबर–बागमती सडक खण्ड स्तरोन्नतिका लागि ठेक्का आह्वान भएको छ ।
सडक विभागले सोमबार बोलपत्र आह्वान गर्दै यस खण्डको विस्तारका लागि ठेक्का निकालेको हो ।
सडक विभागका महानिर्देशक सुशील बाबु ढकालका अनुसार यो खण्डको कुल ७७ किलोमिटर सडक बिस्तार र स्तरोन्नतिका लागि सोमबार ठेक्का आह्वान भएको हो ।
महेन्द्र राजमार्गलाई सरकारले ४ लेनमा विस्तार गरिरहेको छ । सोही अन्तर्गत महेन्द्र राजमार्गको चेनेज २३८ प्लस ०३० देखि ३१२ प्लस ७८५ सम्मका लागि ठेक्का आह्वान भएको हो । यो सडक विश्व बैंकको सहयोगमा स्तरोन्नती गरिँदैछ ।
विभागले कमला–थपलैयासम्मको सडक खण्डको स्तरोन्नतिको तयारी गरेको भए पनि बागमती–पथलैया खण्डको ठेक्काको मोडालिटी तय नभएका कारण केही समय पर सरेको महानिर्देशक ढकालले वानकारी दिए ।
महेन्द्र राजमार्गको स्तरोन्नतिका लागि अहिले विभिन्न खण्डमा काम भइरहेको छ । जसमध्ये बुटवल–चनौटा खण्डको ठेक्का व्यवस्थापनको काम अन्तिम चरणमा रहेको छ । बुटवल–नारायणगढ सडक खण्डको काम सुस्त गतिमा भइरहेको छ ।
– यस समाचारको श्रोत : Online Khabar हो ।