कांग्रेसको पदाधिकारी बैठक जारी

३१ वैशाख, काठमाडौं । नेपाली कांग्रेसको वर्तमान र पूर्वपदाधिकारीहरुको संयुक्त बैठक बसिरहेको छ । बैठक पार्टी सभापति शेरबहादुर देउवाको निवास बुढानीलकण्ठमा जारी छ । संसदको गतिरोध र सरकार जेठ १ गते ल्याउन लागेको नीति तथा कार्यक्रम लगायत विषयमा छलफल गर्न बैठक बसेको हो ।

कांग्रेसले सहकारी संस्थाको रकम हिनामिना प्रकरणमा मुछिएका उपप्रधानमन्त्री एवम् गृहमन्त्री रवि लामिछाने उपर छानबिन गर्न संसदीय समिति गठन हुनुपर्ने अडान राख्दै आएको छ । कांग्रेसको यो अडानका कारण संसदमा गतिरोध कायम छ ।

गतिरोध अन्त्य गरी सरकारको नीति तथा कार्यक्रमलाई सहज ढंगले अघि बढाउने प्रयासमा प्रधानमन्त्री पुष्पकमल दाहाल प्रचण्डले आइतबार कांग्रेस सभापति शेरबहादुर देउवासहितका नेताहरुसँग छलफल समेत गरेका थिए । तर सो छलफल निष्कर्षमा पुग्न सकेको थिएन । कांग्रेस प्रमुख सचेतक रमेश लेखकले भने संसदीय छानबिन समिति गठन हुनुपर्ने आफूहरुको मागमा प्रधानमन्त्री सकारात्मक भएको प्रतिक्रिया पत्रकारहरुलाई दिएका थिए । प्रधानमन्त्री प्रचण्डले पनि सोमबार साँझसम्ममा निकास निस्किने विश्वास व्यक्त गरेका थिए ।

प्रधानमन्त्रीसँगको छलफलपछि कांग्रेसले सोमबार बैठक बसेर आवश्यक निर्णय लिइने जनाएको थियो । सोही अनुसार अहिले कांग्रेसको वर्तमान र पूर्वपदाधिकारीहरुको संयुक्त बैठक बसिरहेको हो । आजै दिउँसो १ बजे संसदीय दल कार्यसमिति र ३ बजे संसदीय दलको बैठक पनि बस्ने तय भएको थियो । तर ती दुवै बैठक स्थगित गरी भोलिका लागि सारिएको छ ।

ती बैठकमा सरकारले नीति तथा कार्यक्रम ल्याउने दिन संसदमा कसरी प्रस्तुत हुने भन्ने विषयमा छलफल गर्ने नेताहरुले बताएका छन् ।

– यस समाचारको श्रोत : Online Khabar हो ।