हिमपातका कारण त्रिभुवन राजपथ अवरुद्ध

१० माघ, हेटौंडा । थाहा नगरपालिकाको सिमभन्ज्याङमा बिहीवार दिउस परेको हिमपातका कारण त्रिभुवन राजपथ अवरुद्ध भएको छ ।

थाहा नगरपालिका वडा नम्बर–४ को पानोरमा रिसोर्टको मोड नजिकैबाट सिमभन्ज्याङतर्फको खण्डमा हिउँ जमेका कारण सडक अवरुद्ध रहेको स्थानीय होटल व्यवसायी अमित पाख्रिनले जानकारी दिए ।

पाख्रिनका अनुसार त्रिभुवन राजपथअन्तर्गत भीमफेदी गाउँपालिकाको लेकाली बसिफाँट स्कूल मोड नजिकैबाट सिमभन्ज्याङतर्फ हिउँका कारण सवारी आवागमनका समस्या भएको हो । हिउँ पर्न रोकिएपनि रातको समयमा चिसो बढेका कारण हिउँ सडकमै जमेको छ ।

त्रिभुवन राजपथको सिमभन्ज्याङ सडक खण्डमा हालसम्म कुनै पनि सवारी जाम भने नरहेको इलाका प्रहरी कार्यालय पालुङले जानकारी दिएको छ । सवारी साधनको चाप कम हुने भएकोले पनि हाल समस्या नभएको प्रहरीले जनाएको छ ।

– यस समाचारको श्रोत : Online Khabar हो ।