बल्छी धुर्बे र पुकुले गरे अष्ट्रेलियाको लोटस टेम्पलअघि ‘हल्का रमाइलो’को छायांकन
काठमाडौं । टेलिभिजन श्रृंखला ‘हल्का रमाइलो’का दर्शकले अष्ट्रेलियामा बसोबास गर्ने नेपालीको कथावस्तुमा नयाँ एपिसोड हेर्न पाउने भएका छन् । निर्देशक तथा कलाकार मरिचमान श्रेष्ठ ‘बल्छी धुर्बे’ले अष्ट्रेलिया पुगेर सिरियलका दुई एपिसोड छायांकन गरेका छन् ।
यी दुई एपिसोड बल्छी धुर्बे र अर्की कलाकार पुजन घिमिरे ‘पुकु’ देखिनेछन् । उनीहरुले क्यारेक्टर पोशाकमै त्यहाँ सिरियल खिचेका छन् । सिड्नीको प्रसिद्ध पर्यटकीय थलो लोटस टेम्पलअघि पनि उनीहरुले पात्र पहिरनमै श्रृंखला खिचे ।
अनलाइनखबरलाई प्राप्त तस्वीरमा उनीहरु लोटस टेम्पलअघि क्यारेक्टर गेटअपमै प्रस्तुत छन् । ‘हल्का रमाइलो’बाहेक उनले त्यहाँ ‘निर्मोहीको याद आउँछ झट्टै’ बोलको म्युजिक भिडियो पनि छायांकन गरे । यो गीतमा पुकुसहित उनी रोमान्टिक देखिएका छन् । यो गीतको कम्पोजर र एरेन्ज एचबीएन किस्मतले गरेका हुन् भने राजु सुनामले गीत लेखेका हुन् ।
यसबाहेक उनले त्यहाँ विद्यार्थीको वास्तविक समस्याबारेको सिरिज पनि खिचेका छन् । तीन साता लामो अष्ट्रेलिया बसाइपछि बल्छी धुर्बे र पुकु सोमबार काठमाडौं आउँदैछन् ।
– यस समाचारको श्रोत : Online Khabar हो ।