‘ढुवानी भइरहँदा पशुको अवस्था हेर्ने जिम्मा क्वारेन्टाइनको हो’

पशु चिकित्सकले पशु ढुवानी प्रमाणपत्र दिंदा पशु स्वस्थ छ कि छैन भनेर हेर्ने हो । पशुमा संक्रामक रोग छ कि छैन भनेर जाँच गरिन्छ, पशुमा संक्रामक रोग छ भने लक्षणको रूपमा ज्वरो आएको हुन्छ । पशु स्वस्थ छैन भने ढुवानी गर्न र बध गर्न पनि मिल्दैन । जाँच गर्दा पशु स्वस्थ छ भने मात्र ढुवानी गर्न मिल्छ ।

पशु ढुवानी मापदण्ड अनुसार हुनुपर्छ भन्ने कुरामा पशु चिकित्सकले जोड दिन्छौं, हाम्रो दायित्व पनि हो । तर, पशु ढुवानीको मापदण्ड पूरा गर्ने मुख्य जिम्मेवारी व्यवसायीको हो । पशु चिकित्सकको काम भनेको पशु स्वस्थ छ कि छैन भनेर हेर्ने मात्र हो ।

पशु चिकित्सकले बिरामी पशु पठाए भने उनीहरू बाटोमै मर्ने हुन्छ नि ! त्यसैले चिकित्सकले बिरामी पशु पठाउँदैनन् । बाटोमा पशुको अवस्था कस्तो छ भनेर हेर्ने जिम्मेवारी त पशु क्वारेन्टिनको हो नि !

लामो दूरीको बसको यात्रा गर्दा मानिसहरू बिरामी नै हुन्छन् । त्यस्तै यति लामो दूरीको अनि यस्तो खाल्डाखुल्डी भएको सडकमा २० देखि २५ घण्टा यात्रा गर्दा उनीहरू पनि बिरामी हुन्छन् ।

लामो दूरीको ढुवानीको क्रममा पशुहरू बिरामी हुन्छन् त्यसैले काठमाडौं ल्याएर बध गर्नुभन्दा अघि उनीहरूको स्वास्थ्य जाँच गरेर मात्र बध गर्नुपर्ने हो तर त्यस्तो हुँदैन ।

पशुलाई यति लामो ढुवानी गरेर ल्याएपछि २४ घण्टा आराम गराएर मात्र बध गर्नुपर्छ । तर, ल्याएर आराम नगरी र स्वास्थ्य जाँच नै नगरी पशुको बध गरेर मासु वितरण गरिन्छ । यस्तो गर्दा उपभोक्ताले स्वस्थ मासु उपभोग गर्न पाएका हुँदैनन् । यो कुरामा काठमाडौं महानगरले ध्यान दिनै पर्छ ।

सरकारले स्वस्थ मासु उत्पादनका लागि बनाएको पशु बधशाला र मासु जाँच ऐन, २०५५ र पशु बधशाला तथा मासु जाँच नियमावली, २०५७ पनि लागू भएको छैन ।

(पशु चिकित्सक डा. सिंहसँग अनलाइनखबरकर्मी सुमित्रा लुइँटेलले गरेको कुराकानीमा आधारित ।)

– यस समाचारको श्रोत : Online Khabar हो ।