कर्णाली प्रदेश सरकारको प्रवक्तामा कृषिमन्त्री शाह
१३ असार, सुर्खेत । कर्णाली प्रदेश सरकारको प्रवक्ताको जिम्मेवारी भूमि, व्यवस्था, कृषि तथा सहकारी मन्त्री विनोदकुमार शाहले पाएका छन् ।
बिहीबार बसेको प्रदेश मन्त्रिपरिषद्को बैठकले शाहलाई प्रवक्ताको जिम्मेवारी दिने निर्णय गरेको मुख्यमन्त्रीको सचिवालयले जनाएको छ । शाह नेकपा एमालेबाट मन्त्रिपरिषद्मा प्रतिनिधित्व गरिरहेका छन् ।
गत चैत २७ गते मुख्यमन्त्रीमा नियुक्त भएका यामलाल कँडेलले झण्डै साढे दुई महिना पछि प्रदेश सरकारको प्रवक्ताको जिम्मेवारी शाहलाई दिएका हुन् ।
बिहीबार बसेको मन्त्रिपरिषद् बैठकले अर्थ सचिव रविलाल शर्मालाई कानुन मन्त्रालयको सचिवको जिम्मेवारी दिने निर्णय गरेको मुख्यमन्त्री कँडेलका प्रमुख स्वकीय सचिव सूर्यमणि गौतमले जानकारी दिए ।
कानुन सचिव ध्रुव घिमिरेले सरुवा भएदेखि कानुन मन्त्रालय सचिवविहीन बनेको थियो ।
– यस समाचारको श्रोत : Online Khabar हो ।