यस्तो छ ‘ह्रस्व दीर्घ’को पहिलो साताको कमाइ

काठमाडौं । चन्द्र पन्त निर्देशित फिल्म ‘ह्रस्व दीर्घ’ले पहिलो साता सुखद कमाइ गरेको छ । फिल्मले पहिलो ७ दिनमा ५ करोड ५४ लाख रुपैयाँ ग्रस कमाइ गरेको वितरण कम्पनी ब्यांकटेस इन्टरटेनमेन्टले जनाएको छ ।

वितरक मनोज राठीले पहिलो साताको कमाइ उत्साहजनक रहेको बताए । फिल्मले विहिबार मात्रै ५० लाख रुपैयाँ ग्रस कमाएको छ । नीता ढुंगाना र हरिहर अधिकारीसहित भारतीय र नेपाली कलाकारको अभिनय रहेको फिल्मले दुई युवायुवतीको रोचक प्रेमकथालाई प्रस्तुत गर्छ ।

निर्मात्री समेत रहेकी अभिनेत्री नीता ढुंगानाले विहिबार बेलुका फेसबुकमा पोस्ट गर्दै लगानी सुरक्षित गरिसकेको उल्लेख गरेकी छन् । उनले चाँडै विदेशमा समेत फिल्म प्रदर्शन हुने जनाएकी छन् । उनले उक्त पोस्टमार्फत दर्शकलाई धन्यवाद समेत दिएकी छन् ।

एक टेलिभिजन अन्तर्वार्तामा नीताले नेपालमा ५ करोड कमाउँदै गर्दा आफूले २१ करोड ग्रस देखिसकेको बताएकी थिइन् । ‘मैले २१ करोडको ग्रस आँखाले देखिसकेको छु,’ भनेकी छन्, ‘भारतको ओटीटी प्लेटफर्ममा ३ करोड भारुमा फिल्म बेचिसकेको छु । तेलुगु भाषामा हामीले भारतका हलमा नै फिल्म रिलिज गर्दैछौं । यसैले म सुरक्षित छु ।’

– यस समाचारको श्रोत : Online Khabar हो ।