सन्दीप जोरा, सागर र आकाश टोलीबाट बाहिर
२४ भदौ, काठमाडौं । मध्यक्रमका ब्याटर सन्दीप जोरासँगै तीन खेलाडी क्यानडा भ्रमण गर्ने नेपालको अन्तिम टोलीबाट बाहिर भएका छन् ।
क्यानले क्यानडा भ्रमणमा आईसीसी लिग २ र त्रिकोणात्मक टी-२० आई सिरिज खेल्ने १६ सदस्य खेलाडी घोषणा गर्दा सन्दीप जोरा, आकाश चन्द र सागर ढकाल टोलीबाट बाहिर भएका हुन् ।
आकाश र रिजनमध्ये टोलीमा एक तीव्र गतिका बलरले स्थान बनाउने पक्का थियो । दायाँ हाते तीव्र गतिका बलरमा पहिलो रोजाईका सोमपाल कामी, करण केसी र पार्टटाइम गुल्शन झा छन् ।
आवश्यक परेमा आरिफ शेख पनि विकल्प हुनेछन् । त्यसैको कारण बायाँ हाते बलर रिजनले मौका पाएका हुन् । रिजनले गत फेब्रुअरीमा घरेलु मैदान टीयुमा क्यानडाविरुद्ध दुई ओडीआई खेल खेलेका थिए । पछिल्लो डेढवर्ष देखि टोलीमा रहेका बायाँ हाते बलर प्रतिश टोलीमै नभएपछि रिजनले मौका पाएका हुन् ।
त्यस्तै मध्यक्रमका ब्याटर सन्दीप जोरा पनि बाहिरिएका छन् । ओडीआईका दुई प्रमुख ब्याटर भीम सार्की र आरिफ शेखले निरन्तरता पाएपछि सन्दीप बाहिरिएका हुन् ।
स्पिनर सागर ढकाल पनि टोलीमा पर्न सकेनन् । बायाँ हाते दुई स्पिनर सागर र ललित मध्य एक स्पिनरले टोलीमा स्थान बनाउने थिए । पछिल्लो लय अनुसार सागर र अनुभवका आधारमा ललितले स्थान बनाउने सम्भावना थियो ।
पछिल्लो दुई वर्षदेखि टोलीमा रहेका ललितलाई नै नेपालले निरन्तरता दिएको हो । ललितले प्रमुख स्पिनर सन्दीपलाई साथ दिनेछन् ।
पार्टटाइम स्पिनमा दीपेन्द्रसिंह ऐरी र कुशल मल्ल पनि हुनेछन् । आवश्यक परेमा कुशल भुर्तेल र रोहित पौडेलले पनि स्पिन बलिङ गर्न सक्छन् । दीपेन्द्र र रोहित क्यानडामा टोलीसँगै जोडिनेछन् । ग्लोबल टी २० क्यानडा खेल्न डेढ महिना अघि नै त्यहाँ गएका थिए । त्यसपछि क्यानडामै बसेर दीपेन्द्र र रोहितले अभ्यास गरेका थिए ।
नेपालले क्यानडा भ्रमणलाई सुरुवातमा २२ सदस्य टोली घोषणा गरेको थियो । भारतको बेंगलोरमा नेशनल क्रिकेट एकेडेमीमा दुई हप्ता अभ्यास गरेपछि स्पिनर बसिर अहमद, सूर्य तामाङ र तीव्र गतिका बलर कमलसिंह ऐरी श्रीलंका भ्रमणमा पर्न सकेका थिएनन् ।
नेपाल श्रीलंकामा एक हप्ता बसेर सोमबार नै स्वदेश फर्किएको हो । श्रीलंका डेभलप्मेन्टसँग तीन अभ्यास खेल खेल्न नेपाल त्यहाँ गएको थियो । तर वर्षाको कारण सुरुवाती दुई खेल हुन नसक्दा तेस्रो खेलमा नेपाल पराजित भएको थियो ।
क्यानडा, नेपाल र ओमानबीच लिग २ र त्रिकोणात्मक सिरिज हुनेछ । त्यसपछि नेपाल अमेरिका भ्रमणमा जानेछ । नेपाल क्यानडातर्फ मंगलबार प्रस्थान गर्ने तालिका छ । नेपालको १६ सदस्य टोलीमा देव खनाल ट्राभलिङ रिजर्भमा छन् ।
क्यानडा भ्रमणमा नेपालको टोली :
रोहित पौडेल (कप्तान), कुशल भुर्तेल, आसिफ शेख, अनिल शाह, भीम सार्की, आरिफ शेख, कुशल मल्ल, दीपेन्द्रसिंह ऐरी, अर्जुन साउद, सोमपाल कामी, करण केसी, गुलशनकुमार झा, रिजन ढकाल, सन्दीप लामिछाने, ललित राजवंशी र देव खनाल (ट्राभलिङ रिजर्भ)
– यस समाचारको श्रोत : Online Khabar हो ।