हकप्रदमा नबिकेको आँखुखोलाको सेयर लिलामी बिक्रीमा खुल्दै
४ असोज, काठमाडौं । आँखुखोला जलविद्युत् कम्पनीको हकप्रद निष्कासनका क्रममा बिक्री नभएको १७ लाख ५० हजार २४८ कित्ता साधारण सेयर लिलामी बिक्रीमा आउने भएको छ ।
असोज ११ गतेदेखि यस कम्पनीको सेयरमा मूल्य बढाबढ बोलकबोलमार्फत आवेदन दिन सकिनेछ । बिक्री प्रवन्धक नबिल इन्भेस्टमेन्ट बैंकिङका अनुसार असोज २० गतेसम्म यसमा आवेदन दिन सकिनेछ । हाल यस कम्पनीको बजार मूल्य प्रतिकित्ता २०७ रुपैयाँ छ ।
सार्वजनिक सूचनाअनुसार न्यूनतम १०० कित्ता तथा अधिकतम सबै कित्ताका लागि आवेदन दिन सकिनेछ । नबिल इन्भेस्टमेन्ट बैंकको नक्साल कार्यालय तथा नबिल बैंकका शाखा कार्यालयहरु बिर्तामोड, वीरगन्ज, हेटौंडा, जावलाखेल, पोखरा (लेकसाइड), नेपालगञ्ज, सुर्खेत (बराहताल) तथा धनगढी शाखाबाट आवेदन दिन पाइनेछ । आवेदनको फारम तिनै कार्यालयमार्फत १ सय रुपैयाँ तिरेर लिन सकिनेछ ।
पहिले हिमालय ऊर्जाको सेयरमा आवेदन खुल्दै
आँखुखोलाभन्दा पहिले नै हिमालय ऊर्जा विकास कम्पनीको १४ लाख ४६ हजार ३५९ कित्ता साधारण सेयर लिलामी बिक्रीमा आउनेछ ।
असोज ७ गतेदेखि १४ गतेसम्म यस कम्पनीको लिलामी सेयरमा आवेदन दिन सकिने बिक्री प्रवन्धक नबिल इन्भेस्टमेन्ट बैंकिङले जनाएको छ । यसअघि कम्पनीले १ बराबर १ को अनुपातमा हकप्रद सेयर निष्कासन गरेको थियो । सोमा बिक्री नभएको सेयर लिलामी बिक्रीमा आएको हो ।
न्यूनतम १०० र बढीमा सबै सेयरका लागि आवेदन दिन सकिनेछ । हाल यस कम्पनीको मूल्य प्रतिकित्ता २२३ रुपैयाँ १० पैसा छ ।
– यस समाचारको श्रोत : Online Khabar हो ।