एनसीसीए कपमा ग्रेट हिमालय क्रिकेट एकेडेमी विजयी

१७ जेठ, काठमाडौं । भ्याली कप टी–२० क्रिकेट प्रतियोगितामा ग्रेट हिमालय क्रिकेट एकेडेमीले बिहीबार सीईसी भक्तपुरलाई २१ रनले पराजित गरेको छ ।
मूलपानी क्रिकेट मैदानमा ग्रेट हिमालयले पहिले ब्याटिङ गर्दै निर्धारित २० ओभरमा ८ विकेट गुमाई १३८ रन बनाएको थियो । ग्रेट हिमालयका लागि इशान पाण्डेले ३९, दिनेश बुढामगरले २१ र समीर कडेलले २० रन बनाए ।
सीईसीका भूपेन्द्र चन्द र स्वरुप श्रेष्ठले समान दुई र किरण चन्दले एक विकेट लिए ।
जवाफमा सीईसी भक्तपुरले २० ओभरमा ८ विकेट गुमाई ११७ रनमात्र बनाउन सक्यो । सिईसी भक्तपुरका लागि विपिन आचार्यले ४० बलमा सर्वाधिक ६० रन बनाए पनि अन्य खेलाडीले राम्रो प्रदर्शन गर्न सकेनन् ।
स्वरुप श्रेष्ठले १५ र दिनेश सुवेदीले ११ रन बनाए । ग्रेट हिमालयका सन्दीप पराजुली, अभिषेक थापा र चन्द्रकान्त पौडेलले समान २ विकेट लिए । अभिषेक थापा प्लेयर अफ द म्याच घोषित भए ।
लगातार दुई खेल जितेको ग्रेट हिमालय क्रिकेट एकेडेमी समूह विजेताको रुपमा सेमिफाइनल प्रवेश गरेको छ ।
पराजित भएपनि सीईसी भक्तपुर समूह बी को उपविजेता बन्दै सेमिफाइनल पुगेको छ । दुवै खेल हारेको ओसिस क्रिकेट एकेडेमी भने समूह चरणबाटै बाहिरिएको छ ।
यस्तै समूह ए बाट सीइसी काठमाडौं समूह विजेता र भक्तपुर क्रिकेट सन्टर समूह उपविजेताको रुपमा सेमिफाइनलमा प्रवेश गरिसकेका छन् ।
यस्तै महिलातर्फ काठमाडौं र ललितपुर जिल्ला शीर्ष दुईमा रहँदै फाइनल पुगेका छन् । डबल राउण्ड रोविन लिग अन्तर्गत बिहीबार भएको लिगको अन्तिम खेलमा ललितपुरले भक्तपुरलाई ४२ रनले पराजित गर्दै दोस्रो भएर फाइनल पुगेको हो ।
पहिले ब्याटिङ गरेको ललितपुरले २० ओभरमा ४ विकेट गुमाई १२५ रन बनाएको थियो । जवाफमा भक्तपुरले ८ विकेट गुमाएर ८१ रन मात्र बनाउन सक्यो ।
काठमाडौं यसअघि नै शीर्ष स्थानमा रहेर फाइनल पुगिसकेको थियो । ललितपुर र भक्तपुरले ४ खेलबाट समान ३ अंक जोडेपनि ललितपुर नेट रनरेटमा अघि रहँदै फाइनल पुगेको हो ।
– यस समाचारको श्रोत : Online Khabar हो ।