भारतसँग व्यापार सहजीकरण गर्न राजदूत शर्मालाई चेम्बरको आग्रह
४ मंसिर, काठमाडौं । नेपाल चेम्बर अफ कमर्सले भारतसँगको व्यापार सहजीकरण गर्न भारतका लागि नेपाली राजदूत शंकर शर्मासँग आग्रह गरेको छ ।
चेम्बर अध्यक्ष कमलेशकुमार अग्रवाल सहित पदाधिकारी र कार्यसमितिले भारतका लागि नेपाली राजदूत शंकर शर्मासँग भेटवार्ता गरेको छ ।
चेम्बर भवनमा मंगलबार भएको भेटमा चेम्बरले नेपाल भारत व्यापार सहजीकरण एवं नेपालमा लगानीका लागि नवनियुक्त राजदूत शर्मा समक्ष आग्रह गरेको छ ।
चेम्बरका अध्यक्ष अग्रवालले भारतसँग नेपालले स्वतन्त्र एवं खुला व्यापार नीति अंगिकार गरे पनि व्यावहारिक लाभ प्राप्त गर्न नसकेको बताए ।
भारतबाट हुने आयातमा खासै समस्या नरहे पनि निर्यातका क्रममा भन्सारमा सहजीकरण हुन नसकेको अध्यक्ष अग्रवालको भनाइ छ ।
पर्यटन आर्कषण र लगानी मार्फत भारतसँगको व्यापार घाटा न्यूनीकरण गर्न समेत राजदूत शर्मालाई चेम्बरले सुझाव दिएको छ ।
चेम्बर अध्यक्ष अग्रवालले भारतसँगको बढ्दो व्यापार घाटा न्यूनीकरणका लागि जलविद्युत् तथा सेवा क्षेत्रमा भारतीय लगानी आर्कषित गर्नुपर्नेमा जोड दिए ।
व्यापार सहजीकरणका लागि रेलवे ट्रान्सपोर्टेसनमा सहजीकरण, भन्सारमा अन्तर्राष्ट्रियस्तरको क्वारेन्नि ल्याव राख्नका लागि पहल गर्न समेत अध्यक्ष अग्रवालले राजदूत शर्मासमक्ष आग्रह गरे ।
उच्चस्तरीय क्वारेन्टिन ल्याब भन्सारमा नहुँदा भारतबाट आयात–निर्यात हुने वस्तुको गुणस्तर मापन हुन नसकेको भन्दै अध्यक्ष अग्रवालले राजदूत शर्माको ध्यानकर्षण गराए ।
– यस समाचारको श्रोत : Online Khabar हो ।