पहिले नाफामा रहेको नाडेप लघुवित्त अहिले झन्डै ५ करोड नोक्सानीमा

२६ कात्तिक, काठमाडौं । नाडेप लघुवित्त वित्तीय संस्थाले चालु आर्थिक वर्षको पहिलो त्रैमासिक वित्तीय विवरण सार्वजनिक गरेको छ । विवरणअनुसार कम्पनीले तीन महिनामै ४ करोड ९७ लाख रुपैयाँ नोक्सानी ब्यहोरेको छ । गत आर्थिक वर्षको यसै अवधिमा कम्पनीको नाफा ५ लाख १० हजार रुपैयाँ थियो ।

कम्पनीको खुद ब्याज आम्दानी बढ्दा पनि नोक्सानी देखिएको छ । यसको प्रमुख कारण लोन लस प्रोभिजन (इम्पेरिमेन्ट चार्ज) भारी मात्रामा बढ्नु हो । कम्पनीको खुद ब्याज आम्दानी गत आर्थिक वर्षको पहिलो त्रैमासमा ५ करोड १९ लाख रुपैयाँ रहेकोमा अहिले ५ करोड ८३ लाख रुपैयाँ छ ।

त्यस्तै लोन लस प्रोभिजन २ करोड ९० लाख रुपैयाँ छ । पहिले ७९ लाख ७५ हजार रुपैयाँ ‘प्रोभिजन ब्याक’ गरेको थियो । कम्पनीको वार्षिक प्रतिसेयर आम्दानी १० रुपैयाँ २४ पैसा ऋणात्मक छ ।

निष्क्रिय कर्जा पनि उच्च दरमा बढेको छ । कुल कर्जामा यस्तो कर्जा गत वर्षको असोज मसान्तसम्म ६.५६ प्रतिशत रहेकोमा अहिले १०.५१ प्रतिशत छ । आधार दर १४ प्रतिशत छ । प्रतिसेयर नेटवर्थ १७२ रुपैयाँ ९३ पैसा छ । आइतबार बजार बन्द हुँदा यस कम्पनीको सेयर मूल्य प्रतिकित्ता १०२५ रुपैयाँ छ ।

– यस समाचारको श्रोत : Online Khabar हो ।