कोशी ट्रफी : पुलिस र एपीएफलाई पछि पार्दै तीन प्रदेश टोली सेमिफाइनलमा

१ चैत, काठमाडौं। विराटनगरमा जारी कोशी प्रदेश ट्रफी राष्ट्रिय स्तरको टी-२० क्रिकेट प्रतियोगिता सेमिफाइनलमा पुग्ने चार टोलीको टुङगो लागेको छ ।

तीन प्रदेश टोली लुम्बिनी, सुदूरपश्चिम, कर्णालीसँगै विभागीय टोली त्रिभुवन आर्मी क्लब सेमिफाइनलमा पुगेका छन् । दुई विभागीय टोली नेपाल पुलिस क्लब र नेपाल एपीएफ क्लब समूह चरणबाटै बाहिरिएका छन् ।

समूह ए बाट आर्मी ४ खेलमा अपराजित रहँदै ८ अंकका साथ शीर्षस्थानमा रहेर सेमिफाइनलमा पुग्यो । जारी प्रतियोगितामा आर्मी अपराजित एक्लो टोली हो । कर्णाली ४ खेलमा २ मा जित र २ मा हारसहित ४ अंकका साथ दोस्रो स्थानमा रहेर सेमिफाइनलमा पुग्यो ।

मधेशले अन्तिम खेलमा बिहीबार एपीएफलाई २१ रनले हराएपनि सेमिफाइनलमा नेटरनरेटका कारण पुग्न सकेन । समान ४ अंक हुँदा कर्णालीको ०.४५२ नेटरनरेट हुँदा मधेशको माइनस ०.३९३ रह्यो । कोशी ४ खेलमा २ अंकका साथ चौथो स्थानमा रहेर बाहिरियो । विभागीय टोली एपीएफ ४ खेलमा २ अंकका साथ पुछारमा रह्यो ।

समूह बी बाट लुम्बिनी ४ खेलमा ३ मा जित र १ मा हारसहित ६ अंकका साथ शीर्षस्थानमा रहेर सेमिफाइनलमा पुग्यो । समान खेल र नतिजाका साथ ६ अंक भएपनि नेटरनरेटका कारण सुदूरपश्चिम प्रदेश दोस्रो स्थानमा रहेर सेमिफाइनलमा पुग्यो ।

नेपाल पुलिस क्लब समूह बी मा ४ खेलमा २ मा जित र २ मा हारसहित ४ अंकका साथ चौथो स्थानमा रहेर बाहिरियो । समूह बी मा बागमती ४ अंकका साथ तेस्रो र गण्डकी जित विहीन पुछारमा रहेर बाहिरियो । विहीबार बागमतीले नेपाल पुलिस क्लबलाई ३३ रनले हराएपनि सेमिफाइनलमा पुग्न पर्याप्त हुन सकेन ।

पहिलो सेमिफाइनलमा समूह ए को विजेता आर्मी र समूह बी को उपविजेता सुदूरपश्चिम प्रदेशबीच प्रतिस्पर्धा हुनेछ । अर्को सेमिफाइनलमा समूह बी को विजेता लुम्बिनीले समूह ए को उपविजेता कर्णालीसँग खेल्नेछ । सेमिफाइनलमा दुबै खेल शुक्रबार हुनेछन् । फाइनल शनिबार हुनेछ ।

– यस समाचारको श्रोत : Online Khabar हो ।