बहराइनको जस्तो सुविधा पाए नेपालले धेरै राम्रो गर्न सक्छ : प्रशिक्षक एनेस
१४ चैत, मनामा (बहराइन) । नेपाली फुटबल टिमका मुख्य प्रशिक्षक भिनसेन्जो अल्बर्टो एनेसले बहराइन विरुद्धको दोस्रो खेलमा नेपालको प्रदर्शन सुधार भएको बताएका छन् ।
फिफा विश्वकप र एएफसी एसियन कपको दोस्रो चरण अन्तर्गत मंगलबार बहराइनसँग ३-० ले पराजित भएपछि प्रशिक्षक एनेसले नेपाललाई राम्रो खेलेको बताए । ‘अघिल्लो खेल भन्दा राम्रो खेले । ट्याक्टिकल्ली राम्रो खेले । नेपालमा लिग छैन । खेलाडीले स्थानिय कप मात्र खेल्छन् । बलियो टिम विरुद्ध आज नेपालले राम्रो खेल्यो । खेलपछि एनेसले पोष्ट म्याच कन्फेरेन्समा भने ।’
उनले नेपाली टिममा युवा खेलाडीहरु धेरै रहेको र दुई खेलमा ५ खेलाडीले डेब्यु गरेको बताए ।
‘दुई खेलमा ५ नयाँ खेलाडीले डेब्यु गरे । २३ वर्षमुनीका १६ खेलाडी छन् । किरणले मात्र प्रोफेसनल लिग खेल्छन् । अनुभवी खेलाडी थोरै छन् । हामीले तयारीका लागि धेरै समय पाएनौँ,’ एनेसले भने, ‘आज खेलाडीले जे गरे त्यो अमेजिङ छ । बहराइनको शारीरिक र क्वालिटीमा राम्रो छ ।’
यस्तै एनेसले बहराइनबाट नेपालले अनुभव लिएर फर्कने बताए । ‘महत्वपूर्ण कुरा हामी अनुभव बटुलेर फर्कँदैछौँ ।’ उनले भने । ‘यदी नेपालले बहराइन जस्तो सुविधा पाए यो भन्दा धेरै राम्रो गर्न सक्छ ।’
बहराइनसँग पहिलो खेलमा ५-० ले पराजित भएको नेपाल दोस्रो खेलमा ३-० ले पराजित भएको थियो । समूह एचमा नेपालले खेलेको चारवटै खेलमा हार बेहोरेको छ ।
अंक विहिन हुँदै पूछारमा रहेको नेपालको फिफा विश्वकपको छनोटको तेस्रो चरण पुग्ने सम्भावना सकिएको छ । यस्तै समूहको शीर्ष दुईमा रहेर एसियन कपमा सिधै छनोट हुने सम्भावना पनि सकिएको छ ।
अब एसियन कपको छनोटमा फोकस हुने त्यसमा नेपालको लागि अवसर पनि रहेको प्रशिक्षक एनेसले बताए ।
यस्तै नेपालका युवा मिडफिल्डर लकेन लिम्बुले पनि पहिलो खेलको तुलनामा नेपालले बहराइन विरुद्ध दोस्रो खेलमा राम्रो प्रदर्शन गरेको बताए । यसको श्रेय सबै खेलाडीलाई उनको भनाई छ ।
यसैगरी बहराइनका प्रशिक्षक ड्रागनले अपेक्षा गरेजस्तै दोस्रो खेल केही कठिन भएको बताए ।
उनले आफ्नो खेलाडीले क्यारेक्टर देखाएको र भविष्यका लागि राम्रो आशा समेत देखाएको बताए ।
यस्तै नेपालको प्रदर्शन पनि राम्रो भएको भन्दै उनले आगामी दिनमा नेपालले राम्रो प्रदर्शन गर्ने विश्वास पनि व्यक्त गरे । साथै नेपालले युएईसँग अंक खोसेमा आफूहरुलाई सहज हुने समेत आशा राखे ।
नेपाली टोली बुधबार स्वदेश फर्कँदैछ ।
– यस समाचारको श्रोत : Online Khabar हो ।