अवस्था परिवर्तनका लागि नयाँ गठबन्धन : प्रदीप ज्ञवाली

७ साउन, गुल्मी । नेकपा एमालेका उपमहासचिव प्रदीप ज्ञवालीले स्थिर सरकार बनाएर मुलुकलाई समृद्ध बनाउन नयाँ गठबन्धन बनेको बताएका छन् ।

सोमबार प्रेस चौतारी नेपाल गुल्मीले तम्घासमा आयोजना गरेको पत्रकार भेटघाटमा उपमहासचिव ज्ञवालीले स्थिरता सहित जनताको अवस्था परिवर्तनका लागि नयाँ गठबन्धनको सरकार बनेको बताएका हुन् ।

उनले भने, ‘मुलुकलाई सबै क्षेत्रमा गतिशील बनाउन, विकास निर्माणमा भएको बेथिति हटाउन र विकासको गतिमा तीव्रता दिन नेपाली कांग्रेस र नेकपा एमालेबीच सहमति भएर सरकार बनेको हो ।’

मुलुकमा देखिएको बाह्य जोखिम र विचलनलाई अन्त्य गरी राष्ट्रिय हितको सम्बर्द्धनका लागि एमाले सरकारमा गएको ज्ञवालीले बताए ।

राष्ट्रिय हित, देशको अर्थतन्त्रको सुधार, सुशासन कायम र राजनीतिक स्थिरताका लागि यो सरकार गठन भएको ज्ञवालीको तर्क छ । पछिल्लो समय युवामा निरासा पैदा भएको बताउँदै नेता ज्ञवालीले देशको अवस्थालाई परिवर्तन गरेर मुलुकलाई समृद्ध बनाउन एमाले पार्टी सदैव लाग्ने बताए ।

‘माओवादी केन्द्रका अध्यक्ष पुष्पकमल दाहाल प्रचण्डमा ठूला दललाई पालैपालो उपयोग सरकार टिकाइराख्छु भन्ने भ्रम थियो,’ ज्ञवालीले भने, ‘मुलुक गहिरो संकटबाट जोगाउनका निम्ति नयाँ कोर्स सुरु भएको हो ।’

– यस समाचारको श्रोत : Online Khabar हो ।