अतिरिक्त शुल्क फिर्ताको माग गर्दै केएमसीका इन्टर्न चिकित्सक आन्दोलित

६ कात्तिक, काठमाडौं। काठमाडौं मेडिकल कलेज (केएमसी) का इन्टर्न चिकित्सकले बढी शुल्क फिर्ताको माग राख्दै आन्दोलन गरेका छन् ।

१ कात्तिकदेखि आन्दोलनमा उत्रिएका चिकित्सकले मंगलबार छैटौं दिन पनि अस्पतालको बहिरंग सेवा ठप्प पारेका छन् ।

काठमाडौं विश्वविद्यालय अन्तर्गत २०७५÷७६ मा एमबीबीएस अध्ययन गरेका इन्टर्न चिकित्सकसँग कलेजले प्रति विद्यार्थी इन्टर्नसिप शुल्क २ लाख, इन्टर्नल परीक्षा शुल्क १ लाख ८० हजार, केयू रजिष्ट्रेसन शुल्क १ लाख ५ हजार, कम्युनिटी भिजिट शुल्क ९० हजार र एनएमसी रजिष्टे«सन शुल्क ५ हजार गरी कुल ४ लाख ९० हजार बढी शुल्क लिएको विद्यार्थीले जनाएका छन् ।

आन्दोलन गरिरहेका ५० जना नेपाली र ४० जना विदेशी विद्यार्थीबाट कलेजले कुल ३ करोड ७१ लाख ७८ हजार ४ सय रुपैयाँ अतिरिक्त शुल्क असुलेको दाबी छ ।

अतिरिक्त शुल्क लिएको विषयमा अस्पताल प्रशासनसँग शुल्क समायोजन गरिदिन पटक–पटक आग्रह गर्दा पनि कुनै प्रक्रिया नआएपछि आन्दोलनमा उत्रिएको एक इन्टर्न चिकित्सक बताए ।

‘कानुन विपरीत लिएको शुल्कफिर्ता गर्न पटक पटक अनुरोध गयौं । तर प्रशासनले हाम्रो मागलाई सम्बोधन गर्न भएन’, ती चिकित्सकले भने, ‘हामीले विरोधस्वरुप शान्तिपूर्ण आन्दोलन गरेका हौं ।’

अस्पताल व्यवस्थापन प्रमुख नारायणप्रसाद दाहालले अतिरिक्त शुल्कको विषयमा पटक पटक छलफल भएको बताए ।

‘आज उहाँहरुले ओपीडी सेवा समेत ठप्प बनाउनुभएको छ । पुरानो व्यवस्थापनसँग के कस्तो सम्झौता गर्नुभएको थियो थाहा छैन’, दाहालले भने, ‘विद्यार्थी इन्टर्नसिप शुल्क लिएको २ लाख फिर्ता गर्छौं । अन्य पैसाको बारेमा थाहा छैन ।’

विद्यार्थीहरुले भने बढी लिएको सबै शुल्क फिर्ता नभएसम्म आन्दोलन जारी रहने बताएका छन् ।

– यस समाचारको श्रोत : Online Khabar हो ।