यु-१८ लिगमा खुमलटारको विजयी सुरुवात
३० असार, काठमाडौं । खुमलटार फुटबल क्लबले ललित स्मृति यू-१८ युथ लिगमा विजयी सुरुआत गरेको छ।
सातदोबाटोस्थित एन्फा कम्प्लेक्समा आइतबार भएको दोस्रो खेलमा खुमलटारले छिमेकी सातदोबाटो युथ क्लबलाई २–० गोलले पराजित गरेको हो। खुमलटारका लागि कप्तान एलिक श्रेष्ठ र जंगे रायमाझीले गोल गरे।
कप्तान एलिकले १९औं मिनेटमा गोल गर्दै खुमलटारलाई अग्रता दिलाएका थिए । यस्तै जंगेले पहिलो हाफको अन्तिम समयमा गोल गरेका थिए ।
आइतबारै भएको उद्घाटन खेलमा न्युरोड टिम (एनआरटी) ले चर्च ब्वाइज युनाइटेडलाई पराजित गर्दै विजयी सुरुवात गरेको छ ।
अखिल नेपाल फुटबल संघ (एन्फा) ले पहिलो पटक आयोजना गरिरहेको यू-१८ युथ लिगमा १२ क्लबले प्रतिस्पर्धा गर्नेछन् ।
लिगमा सोमबार पनि दुई खेल हुनेछ । एन्फा कम्प्लेक्समा हुने पहिलो खेलमा नेपाल पुलिस क्लब र थ्री स्टार क्लब तथा दोस्रो खेलमा जावलाखेल युथ क्लब र एपीएफ फुटबल क्लबबीच प्रतिस्पर्धा हुनेछ ।
– यस समाचारको श्रोत : Online Khabar हो ।