२०८२ वैशाखभित्रै जिल्ला अधिवेशन सक्ने राप्रपाको निर्णय
१६ असार, काठमाडौं । राष्ट्रिय प्रजातन्त्र पार्टीले आगामी स्थानीय तहको निर्वाचनलाई ध्यान दिएर २०८२ वैशाखभित्रै सबै जिल्लाको अधिवेशन सक्ने निर्णय गरेको छ ।
आइतबार बसेको राप्रपाको कार्यसम्पादन समितिको बैठकले पार्टीको सबै तहको चॅाडो निर्वाचन गर्नुपर्ने निश्कर्ष निकालेको प्रवक्ता मोहनकुमार श्रेष्ठले जानकारी दिए ।
कार्यसम्पादन समितिको बैठकले जिल्ला अधिवेशनको कार्यविधि पनि संशोधनसहित पारित गरेको छ । कार्यविधिमा वडा तहदेखि जिल्ला तहको अधिवेशन गर्न निर्वाचन तालिका बनाउने विषय समावेश छ ।
त्यस्तै केन्द्रीय निर्वाचन समिति ९ सदस्यीय रहने गरी र जिल्ला निर्वाचन समितिको संयोजक जिल्ला कार्यसमितिको सिफारिसमा केन्द्रीय निर्वाचन समितिले तोक्ने निर्णय पनि गरेको छ ।
राप्रपाले बाढी पहिरोका कारण जनधनको क्षति हुन थालेको भन्दै सचेत रहन आम नागरिकलाई आग्रह गरेको छ । त्यस्तै वर्षातले पुऱ्याउन सक्ने सम्भावित क्षतिप्रति चनाखो बन्न, बाढिपहिरो लगायतका घटना भइहालेमा तुरुन्तै क्रियाशील बन्न सबै तहका पार्टी कमिटी र सदस्यलाई आग्रह गरेको छ ।
खेतीको समय सुरु भइसकेको अवस्थामा किसानलाई सहज र सरल ढंगबाट रासयनिक मल, बिऊबिजन उपलब्ध गराउन पनि राप्रपाले माग गरेको छ ।
– यस समाचारको श्रोत : Online Khabar हो ।