४६ वर्षको उमेरमा पनि १८ वर्षे लुक्स ! जवान देखिने सुत्र बेचेर मनग्गे आम्दानी
ब्रायन जोन्सन नामका एकजना अर्बपति तथा प्रविधि उद्यमीले दाबी गरेका छन् कि उनले एन्टी एजिंग अर्थात् बुढ्यौली हटाउने सुत्र पत्ता लगाएका छन् ।
जवान देखिने त्यो गोप्य सुत्र उनले हरेक व्यक्तिलाई ३४३ डलरमा बिक्री सुरु गरेका छन् । आफूले त्यही कोडबाट आफ्नो जैविक उमेरलाई उल्टाउन सफल भएको जिकिर उनको छ । जसका कारण उनी आफ्नो वास्तविक उमेरभन्दा निकै जवान देखिन्छन् ।
जवान देखिने उक्त सुत्रको नाम उनले प्रोजेक्ट ब्लूप्रिन्ट राखेका छन् । त्यसमा विशेष भोजनसँगै दैनिक १०० भन्दा धेरै चक्कीहरु खानुपर्दछ ।
जोन्सनले उक्त जानकारीलाई ब्लुप्रिन्ट स्टेकको नामबाट बिक्री गरिरहेका छन् । त्यसमा ड्रिंक्स मिक्स, प्रोटिन, ८ वटा चक्की, स्नेक आयल, ६७ प्रकारका शक्तिशाली थेरापी तथा ४ सय क्यालोरी सामेल छन् ।
एक हजारभन्दा धेरै क्लिनिकल ट्रायलबाट उक्त सुत्र तयार भएको र त्यसमा आफूले निकै गहन अनुसन्धान गरेको उनको दाबी छ ।
उनका अनुसार त्यो सुत्र हरेक महिना ३४३ डलरमा किन्न पाइन्छ, जुन सामान्य खाजा खर्चभन्दा पनि सस्तो पर्ने उनले बताएका छन् ।
उनको उद्देश्य मानिसहरुको खानालाई पूर्णरुपमा बदल्नु नभई केही अत्यावश्यक सप्लिमेन्टसँग सम्बन्धित कमीहरुलाई पूरा गर्नु हो ।
सिलिक भ्यालीका पूर्वकार्यकारी जोन्सन जवान देखिने आफ्नो सनकलाई लिएर चर्चित व्यक्ति नै हुन् । आफ्नो उमेर ४६ वर्ष भएपनि अहिले १८ वर्षको जस्तो देखिने गरेको उनी बताउँछन् । साथै उक्त सुत्रको पालना गर्दा आफ्नो स्वास्थ्यमा पनि सुधार भएको उनको भनाइ छ ।
प्रोजेक्ट ब्लु प्रिन्टमा उनले ठूलो लगानी गरेका छन् । जसमा विशेष भोजन, चिकित्सा निगरानी, उपचार तथा व्यायाम छन् ।
जवान बनाउने उनको त्यो प्रडक्ट अमेरिका, अष्ट्रेलिया, क्यानडा, विभिन्न युरोपेली मुलुकहरुसँगै यूएईलगायतका २३ देशमा उपलब्ध रहेको बताइएको छ।
स्मरण रहोस् केही महिनाअघि उनले एउटा स्व विकशित कार्यक्रमको माध्यमबाट कपाल झर्न रोक्ने दाबी गरेका थिए ।
– यस समाचारको श्रोत : Online Khabar हो ।