भ्लगर रतन कार्कीको अभिव्यक्तिविरुद्ध प्रहरीले अनुसन्धान अघि बढायो
२० कात्तिक, काठमाडौं । भ्लगर रतन कार्कीविरुद्ध प्रहरीले अनुसन्धान अघि बढाएको छ । युट्युब तथा सामाजिक सञ्जालमा सक्रिय कार्कीविरुद्ध प्रहरीको केन्द्रीय साइबर ब्यूरोले अनुसन्धान अघि बढाएको हो ।
दशरथ रंगशालामा साफ वुमन्स च्याम्पिनसिपको फाइनल खेल भइरहेका बेला युट्युब लाइभमा उनले दिएको अभिव्यक्ति उछृङ्खल भएको भन्दै प्रहरीले अनुसन्धान अघि बढाएको हो । प्रधानमन्त्री केपी शर्मा ओलीले समेत खेल भएको दिन उनले रंगशालामा ‘मार्न सकिने’ अभिव्यक्ति दिएको प्रहरीको भनाइ छ ।
उनी अहिले विद्यार्थी भिसामा जापानमा रहेको बताइन्छ । उछृङ्खल अभिव्यक्ति दिएर समाज नै भड्काउने र अराजकता मच्चाउने काम गरेको भन्दै कार्कीविरुद्ध ब्यूरोले अनुसन्धान अघि बढाएको हो ।
‘उहाँको अभिव्यक्तिविरुद्ध हामीले अनुसन्धान अघि बढाएका छौं । यस्ता अभिव्यक्ति दिनेलाई इन्टरपोलको सहयोगमार्फत नेपाल ल्याएर कारबाही गर्न सक्छौं’, साइबर ब्यूरोका एक अधिकारीले अनलाइनखबरसँग भने ।
भ्लगर कार्कीले मागे माफी
प्रहरीले अनुसन्धान अघि बढाएपछि सामाजिक सञ्जालमा एक भिडिओ पोस्ट गर्दै आफ्नो अभिव्यक्तिप्रति माफी मागेका छन् ।
आफ्नो इन्टेन्सन त्यस्तो नभए पनि बोल्ने बेलामा जिब्रो चिप्लिएर मार्छु भन्ने शब्द प्रयोग भएको भन्दै उनले स्ष्टीकरण दिएका छन् । उक्त शब्द प्रति माफीसमेत माग्दै उक्त भिडिओसमेत आफूले हटाइसकेको भ्लगर कार्कीले उल्लेख गरेका छन् ।
– यस समाचारको श्रोत : Online Khabar हो ।