मन्त्रिपरिषद्को बैठक आह्वान
१३ कात्तिक, काठमाडौं । मन्त्रिपरिषदको बैठक आज बस्दै छ । प्रधानमन्त्री केपी शर्मा ओलीको सचिवालयका अनुसार साँझ ५ बजे बस्ने गरी मन्त्रिपरिषदको बैठक बोलाइएको छ ।
बैठकमा ट्र«ङ्कलाइन र डेडिकेटेड विद्युत सम्बन्धी विवाद लगायतका विषयमा छलफल हुने स्रोतले जनाएको छ ।
सोमबार र बिहीबार मन्त्रिपरिषदको नियमित बैठक बस्ने गर्दछ । हिजो सोमबार प्रधानमन्त्रीको व्यस्तताले मन्त्रिपरिषदको बैठक नराखिएको उनको सचिवालयले जनाएको छ ।
गत २४ असोजमा नेपाल विद्युत् प्राधिकरणले डेडिकेटेड र ट्रंक लाइन विवादमा बक्यौता रहेका भनिएका ४९ वटा उद्योगलाई बक्यौता बुझाउन १५ दिने अल्टिमेटम दिएको थियो । त्यसको म्याद ८ कात्तिकमा सकिएपछि प्राधिकरणले लाइन काट्न सुरू गरेको थियो ।
यस विषयमा छलफल गर्न भनेर ८ कात्तिकमा बसेको प्राधिकरणको सञ्चालक समिति बैठकमा समिति अध्यक्ष एवम् ऊर्जा, जलस्रोत तथा सिँचाइमन्त्री दीपक खड्काले लाइन नकाट्न निर्देशन दिएका थिए । तर प्राधिकरणका कार्यकारी निर्देशक कुलमान घिसिङले त्यसोभए लाइन नकाट्ने भनेर मन्त्रिपरिषदबाट निर्णय हुनुपर्ने बताएका थिए ।
– यस समाचारको श्रोत : Online Khabar हो ।