अनुराग कश्यप पनि काठमाडौंमा, भन्छन् : नेपाली फिल्म हिन्दीभन्दा उत्कृष्ट बन्न थालेका छन्
काठमाडौं । बलिउड निर्देशक अनुराग कश्यप शनिबार काठमाडौं आइपुगेका छन् । नेपाली फिल्म ‘शाम्बाला’को प्रिमियरमा सहभागि हुन उनी दिल्ली हुँदै काठमाडौं आएका हुन् ।
उनलाई त्रिभुवन अन्तर्राष्ट्रिय विमानस्थलमा शाम्बाला निर्देशक मीन भामसहितले स्वागत गरे । काठमाडौं एयरपोर्टमा उनले अनलाइनखबरसँग कुरा गर्दै नेपाली फिल्मको विकासको प्रशंसा गरे ।
नेपाली फिल्म हिन्दीभन्दा उत्कृष्ट बन्न थालेको भन्दै निर्देशक कश्यपले प्रशंसा गरे । नेपाली फिल्मको निर्माणमा सघाउन आफू तयार रहेको उनले बताए । यस्तो छ कश्यपसँगको संक्षिप्त संवाद :
के तपाईंको यो पहिलो भ्रमण हो ?
म गोरखपुरमा जन्मिएँ । म यसपटक पनि पशुपति दर्शनको लागि आइसकेको छु ।
‘शाम्बाला’ प्रिमियरबाहेक यसपटकको नेपाल भ्रमणका योजना के छन् ?
मलाई खानाका परिकार बुझ्न र जान्न रुचि छ । खाएजति स्थानीय खानाका परिकार चाख्न मन छ । मेरो कलेजको साथी कमल र संसारकै प्रसिद्ध न्यूरो डाक्टर यामबहादुर रोका पनि नेपाली नै हुन् । यसपटकको नेपाल भ्रमणमा उनीहरुलाई भेट्नेछु ।
तपाईंले कुनै नेपाली फिल्म हेर्नुभएको छ ?
मैले प्रेमगीत र कालोपोथी भन्ने फिल्म हेरेको छु । ‘कालोपोथी’ निकै मनपर्यो ।
बलिउड र नेपालबीच फिल्मलाई लिएर भविष्यमा कुनै सहकार्य हुनसक्ने सम्भावना देख्नुहुन्छ ?
निश्चय नै, नेपाली फिल्म, हिन्दीभन्दा उत्कृष्ट बन्न थालेका छन् । त्यो सम्भावना हुनसक्छ ।
तपाईं नेपाली फिल्ममेकरसँग सहकार्य गर्ने योजनामा हुनुहुन्छ ?
नेपाली फिल्म निर्माणमा म सघाउन तयार छु । कुन भाषामा बनाउँछु थाहा भएन तर, म सघाउन तयार छु नेपालको लागि ।
तपाईंलाई नेपालको कुन पक्षमा मन पर्छ ।
मलाई नेपालको संस्कृति बुझ्न मन छ । नेपाली संसारका प्रिय मान्छेहरु हुन् ।
– यस समाचारको श्रोत : Online Khabar हो ।