अविनाशको ‘लोरी’ अमेरिकाको ‘इण्डियन फिल्म फेस्टिभल’मा छनोट
काठमाडौं । कान्समा स्पेसल मेन्सन अवार्ड जितेको अविनाश विक्रम शाह निर्देशित छोटो फिल्म ‘लोरी’ अमेरिकाको लस-एन्जलसमा आयोजना हुन लागेको इण्डियन फिल्म फेस्टिभलमा छनोट भएको छ ।
फेस्टिभलको ‘सर्ट्स फिल्म’ विधामा यो १५ मिनेटको फिल्म छनोट भएको फेस्टिभलद्वारा जारी विज्ञप्तिमा उल्लेख छ । फेस्टिभलको २२ औं संस्करण जुन २७ देखि ३० सम्म हलिउडमा आयोजना हुँदैछ ।
लाइनअपअनुसार यसपटक करण जोहर र गुनित मोंगाले निर्माण गरेको ‘किल’को विशेष प्रदर्शन हुँदैछ । ७ कथानक, १२ छोटा र एउटा डकु-सिरिजसहित २० फिल्म स्क्रिनिङ हुँदैछन् ।
फिल्मको सूचीमा भारत, नेपाल, बंगलादेश, श्रीलंका, पाकिस्तान र अमेरिकाका फिल्म समावेश छन् । ओपनिङ फिल्मको रुपमा तार्सिम सिंहको ‘डियर जस्सी’ र क्लोजिङ फिल्मको रुपमा निथिलान सामिनाथनको ‘महाराजा’ प्रदर्शन हुँदैछन् ।
‘लोरी’को कुरा गर्दा, एउटी आमाले आफ्नी १२ वर्षकी छोरीलाई शान्त तुल्याउन लोरी गाउँछिन् । जब लोरी समाप्त हुन्छ र छोरी होसमा आउँछिन् वास्तविकता धेरै डरलाग्दो र जीवन परिवर्तन गर्ने देखिन्छ ।
यो फिल्मको स्क्रिप्ट र डायलग स्वयं शाहले लेखेका हुन् भने छायांकन उज्वलकुमार बस्ताकोटीले गरेका हुन् । अंकिता यादव, सुजिता साह र प्रीति झाले यसमा अभिनय गरेका छन् । नेपालको अन्डरग्राउन्ड टकिज र हङकङको पेट्रा फिल्मसले संयुक्तरुपमा यसलाई निर्माण गरेका हुन् ।
– यस समाचारको श्रोत : Online Khabar हो ।