असन्तुष्टिको नेतृत्व लिने माओवादी प्रयास

१० कात्तिक, काठमाडौं । लामो समय सत्तामा बसेको नेकपा माओवादी केन्द्रले शनिबार राजधानी काठमाडौंमा खबरदारी सभा गरेको छ ।

सभामा माओवादीका शीर्ष नेताहरुले सरकारलाई सुशासनको अभियान नरोक्न खबरदारी गरेका छन् । सँगै, खबरदारी सभाको औचित्यमाथि उठेको आशंकाप्रति प्रष्टोक्ति पनि दिएका छन् ।

किनकि सहकारी बचत रकम अपचलनको मुद्दामा पक्राउ परेका रवि लामिछाने र उनको पार्टी रास्वपालाई साथ दिनेगरी माओवादीले सडक प्रदर्शन राखेको टिप्पणी भइरहेको छ ।

रवि पक्राउअघि त्यसैदिन २ कात्तिकमा माओवादी अध्यक्ष पुष्पकमल दाहाल प्रचण्डकै पहलकदमीमा विपक्षी दलहरु सम्मिलित संयन्त्र बनाएर १३ बुँदे साझा मागपत्र प्रधानमन्त्री केपी शर्मा ओलीलाई बुझाइएकाले पनि यस्तो टिप्पणी स्वाभाविक देखिन्थ्यो ।

तर माओवादी नेताहरुले शनिबार भएको खबरदारी सभा रविको समर्थनमा नभएको स्पष्टीकरण दिएका हुन् । ‘दोषी कोही बच्न हुन्न, निर्दोष कोही फस्न हुन्न । हामीले हिजो त्यही भनेका थियौं, अहिले पनि यही भन्छौं’, खबरदारी सभामा प्रचण्डले स्पष्टीकरण दिए, ‘सबै सहकारी पीडितहरुले न्याय पाउनुपर्छ । सहकारी ठगहरुलाई कारबाही गर्नुपर्छ ।’

आफू प्रधानमन्त्री हुँदा पनि संसदीय छानबिन समिति बनाउनुपर्छ भनेको उनले स्मरण गरे । यद्यपि रविलाई पक्राउ गरेको सरकारले सहकारी ठगीमा संलग्न कांग्रेस र एमाले नेताहरुलाई केही नगरेको भन्दै आपत्ति जनाए । ‘सरकारले जे रबैया अपनाएको छ, त्यसमा हाम्रो आपत्ति छ’, पूर्वप्रधानमन्त्री प्रचण्डले भने ।

उनीअघि बोलेका वरिष्ठ उपाध्यक्ष नारायणकाजी श्रेष्ठको रवि पक्राउ प्रकरणबारे स्पष्टीकरण दिएका थिए । ‘अनुसन्धान स्वच्छ र निष्पक्ष हुनुपर्छ, भेदभाव चाहिँ गरिनु हुन्न हामीले भनेको यत्ति हो’, उनले भने ।

माओवादीका एक पदाधिकारीका अनुसार सडक प्रदर्शनको कार्यक्रम राख्ने बेलामा नै सम् भावित टिप्पणीबारे छलफल भएको थियो । त्यो छलफलमा अरु नेताको तुलनामा अध्यक्ष प्रचण्ड रविप्रति केही नरम थिए, तर सहकारी ठगी प्रकरणमा पूर्वगृहमन्त्री रविको बचाउ गर्न हुन्न भन्नेमा सबै एकमत थिए ।

‘रविलाई प्रोटेक्ट गर्न सकिन्न । अरु जोजो संलग्न छन्, उनीहरुलाई पनि कारबाही गर्न र पीडितलाई न्याय दिन दबाब दिनुपर्छ भन्ने नै हाम्रो साझा निष्कर्ष थियो’, एक पदाधिकारी भन्छन्, ‘त्यसअनुसार नेताहरुले आज प्रष्ट पार्नुभएको छ ।’

सरकारलाई सन्देश

खबरदारी सभामा माओवादी नेताहरुले प्रचण्ड नेतृत्व सरकारले थालेको भ्रष्टाचार विरोधी र सुशासनको पक्षमा थालेको अभियानलाई नरोक्न खबरदारी गरेका छन् ।

तर वर्तमान सरकार सुशासनविरुद्ध र भ्रष्टाचारी बचाउन बनेको आशंका रहेको भन्दै प्रचण्डले भने, ‘आज त्यो सरकारले पुष्टि गरेको छ ।’
उपाध्यक्ष श्रेष्ठले पनि यो सरकार बनेकै भ्रष्टाचार विरोधी अभियान रोक्न भएको बताए ।

बाढी तथा पहिरो पीडितहरुको उद्दार तथा राहतमा पनि सरकार चुकेको प्रचण्डले बताए । नख्खुमा चार घण्टासम्म गुहार माग्दासमेत नागरिकको उद्दार गर्न नसकेको भन्दै उनले त्यहाँ नागरिक होइन, सरकार मरेको टिप्पणी गरे ।

तर अब जे गरेपनि हुन्छ भन्ने नठान्न नेताहरुले सरकारलाई चेतावनी दिए । संसदमा भद्र रुपमा जवाफ माग्ने, नभए सडकबाटै जवाफ खोज्ने प्रचण्डको चेतावनी छ । भुटानी शरणार्थी, बाँसबारी जग्गा, बालमन्दिर लगायत प्रकरण कहाँ पुग्यो भन्ने प्रश्न गर्दै प्रचण्डले भने, ‘जे गरेपनि हुन्छ, जवाफ दिनुपर्दैन भन्ने लागेको होला । संसदको रोष्ट्रममा भद्र तरिकाले मागिन्छ जवाफ ।’

निहुँ खोजे विशेष अधिवेशन माग गर्ने भन्दै उनले चेतावनीको भाषामा थपे, ‘धेरै अभद्र भयो सडकमै घिसारेर सडकमै अभद्र तरिकाले मागिन्छ जवाफ ।’

असन्तुष्टिको नेतृत्व गर्ने प्रयास

माओवादी नेताहरुका अनुसार रविबारे स्पष्टीकरण दिनु खबरदारी सभाको मुख्य उद्देश्य होइन । यो त माओवादीले सडक आन्दोलनका लागि गरेको एउटा ट्रायल थियो, जुन सोचेभन्दा सफल भएको नेताहरुको दाबी छ ।

संसदको पहिलो र दोस्रो दल मिलेर बनेको सरकारको सय दिने कामकारबाहीले जनतामा असन्तुष्टि कम नगरेको, बरु बढाउने काम गरेको माओवादी बुझाइ छ ।

यस्तो बेला माओवादी सडकमा नआए अराजकतावादी वा प्रतिगामी शक्तिले टाउको उठाउन सक्ने विश्लेषणकै अधारमा यो सभा गरिएको ती पदाधिकारी बताउँछन् ।

प्रचण्डले खबरदारी सभामै पनि यसबारे बोले, ‘अब माओवादी सडकमा आएन भने संघीय लोकतान्त्रिक गणतन्त्र खतरामा पर्छ, अराजकतावादी, प्रतिक्रान्तिकारी प्रतिगमनकारीहरुले टाउको उठाउने खतरा हुन्छ ।’

रवि पक्राउको विरोध गर्दै सडकमा आएको रास्वपाले जनतामा बढ्दो असन्तुष्टिको नेतृत्व गर्ने प्रयास गरेकै छ । पाँचौं ठूलो दल राप्रपा पनि राजतन्त्र र हिन्दुराष्ट्रको एजेण्डा बोकेर मंसिरदेखि सडकमा आउने तयारीमा छ ।

विपक्षमा रहेका अरु दल पनि ढिलो चाँडो सडकमा आउने माओवादी बुझाइ छ । अर्थात् शनिबारको प्रदर्शन सरकारलाई खबरदारी मात्र होइन, सडकमा आएर जनतामा बढ्दो असन्तुष्टिको नेतृत्व गर्ने प्रयास पनि हो ।

खबरदारी सभामा बोल्ने माओवादी नेताहरुले अरु दल भन्दा माओवादी फरक देखाउने प्रयास गरे । कांग्रेस र एमालेसँग गठबन्धन पालैपालो फेर्दै करिव १७ महिना सरकारको नेतृत्व गरेका प्रचण्डले कांग्रेस र एमालेसँग सहकार्य गर्नु गल्ती भएको बताए ।

सबै दल उस्तै देखिन लागेका बेला बेला सरकारबाट निकालिदिएर जनतातिर फर्काइ दिएकोमा धन्यवाद दिए । उनले अगाडि भने, ‘फेरि कांग्रेस फउकाला, एमाले फकाउला भन्ने चिन्ता नगर्नुस् । मन्त्री– प्रधानमन्त्री बनाइदिनुस् भनेर आउने छैनौं, हामी सच्चिन चाहन्छौं ।’

सहभागी नेताहरुका अनुसार प्रदर्शनमा जनहसभागिताले प्रचण्ड उत्साहित देखिएका छन् । किनकी तिहारको मुखमा चार दिनको छोटो तयारीमा खबरदारी सभा राखेकाले कतिको समर्थन मिल्ला भन्ने डर माओवादीभित्र थियो ।

अनि, माओवादीले एकल रुपमा सडक प्रदर्शन नगरेको एक दशक भइसकेको थियो । पछिल्लो पटक २०७७ मंसिर र २०७८ जेठको प्रनिनिधि सभा विघटनविरुद्ध माओवादी सडकमा आएको थियो, तर त्यो प्रदर्शन माओवादीको एकल थिएन । माधवकुमार नेपाल–झलनाथ खनाल समूह (जसको ठूलो एमालेमै बस्यो भने एउटा पंक्ति हाल एकीकृत समाजवादीमा छन्) ले साथ दिएका थिए ।

त्यसैले चुनौती लिएरै सडकमा उत्रने निर्णय लिएको माओवादी नेताहरुले शनिबार विहानसम्म २० हजार हाराहारी उपस्थित भए प्रदर्शन सफल मान्नुपर्ने निष्कर्ष निकालेका थिए । तर त्यो भन्दा बढी सहभागिता देखिएको भन्दै उपमहासचिव गिरिराजमणि पोखरेलले भने ‘आजको प्रदर्शन सोचेभन्दा सफल भयो ।’

खबरदारी सभामै माओवादी अध्यक्ष प्रचण्डले जम्मा चार दिनको तयारीमा अपार उपस्थिति भएको भन्दै धन्यवाद दिए । ‘खबरदारी सभाको सन्देशलाई गम्भीर रुपलाई लिएन भने भोलिको दिन कस्तो हुनेछ भन्ने संकेत गरेको छ’, उनले सरकारलाई चेतावनी दिए, ‘एक महिना तयारी गर्‍यौं भने थेग्न सक्छ यो सरकारले ?’

– यस समाचारको श्रोत : Online Khabar हो ।