कर्णाली याक्सको विदेशी खेलाडी : विश्वचर्चित धवनदेखि विस्फोटक बाबरसम्म

७ मंसिर, काठमाडौं । नेपाल क्रिकेट संघ क्यानको आयोजनामा हुन लागेको फ्रेन्चाइज क्रिकेट प्रतियोगिता नेपाल प्रिमियर लिग (एनपीएल) क्रिकेट प्रतियोगिता आगामी मंसिर १५ गतेदेखि काठमाडौंस्थित टीयू क्रिकेट मैदानमा सुरू हुँदै छ ।

८ टोलीको सहभागिता रहने प्रतियोगितामा कर्णाली प्रदेशको प्रतिनिधित्व गर्ने टिम हो कर्णाली याक्स । टिमको मार्की खेलाडीका रुपमा नेपाली राष्ट्रिय टोलीका अलराउण्डर सोमपाल कामी छन् । उनीसँगै टोलीमा राष्ट्रिय टोलीका युवा अलराउण्डर गुल्शन झा पनि छन् ।

त्यसैगरी नेपाली राष्ट्रिय टिमका पूर्व कप्तान ज्ञानेन्द्र मल्ल कर्णालीको मुख्य प्रशिक्षक र डिरेक्टर अफ क्रिकेटको भूमिकामा छन् ।

एनपीएलका लागि हरेक फ्रेन्चाइजले चार विदेशी खेलाडी अनिवार्य अनुबन्ध गर्नुपर्नेछ । खेलाडीको उपलब्धता हेरेर एक टिमले ६ जना सम्म विदेशी खेलाडी अनुबन्ध गर्न सक्ने प्रावधान छ ।

कर्णाली याक्सले हालसम्म चारवटा विदेशी खेलाडी अनुबन्ध गरेको छ । छिमेकी राष्ट्र भारतका लागि तीनवटै फर्म्याट खेलिसकेका एसिया कप, च्याम्पियन्स ट्रफी तथा आइपीएल जितेका विश्वचर्चित खेलाडी शिखर धवनदेखि नेपालमा परिचित रहेका हङकङका बाबर हायातसम्म कर्णालीले एनपीएलका लागि अनुबन्ध गरेको छ । यी दुईबाहेक कर्णालीमा पाकिस्तानका हुसेन तलात र वेस्ट इन्डिजका चाडविक वाल्टन पनि कर्णालीबाट खेल्दै छन् ।

कर्णालीमा अनुबन्धित विदेशी खेलाडीहरूमध्ये धवनबाहेक सबैले यसअघि पनि नेपालमा आएर लिग खेलिसकेका छन् । बाबर हायातले नेपालका हरेकजसो लिग खेल्दा तलात र वाल्टनले नेपाल टी२० लिग खेलेका छन् ।

कस्ता छन् कर्णालीका विदेशी खेलाडी ?

शिखर धवन

केही समयअघि मात्र सबैखाले क्रिकेटबाट सन्यासको घोषणा गरेका भारतका चर्चित खेलाडी धवन एनपीएलका लागि आउने विदेशी खेलाडीमा सबैभन्दा ठुलो नाम हो ।

बाँयाहाते ब्याटर उनले ओपनिङमा खेल्ने गर्छन् भने भारतीय टोलीबाट सन् २०१३ को च्याम्पियन्स ट्रफी तथा सन् २०१६ र २०१८ को एसिया कप जितेका छन् । त्यसैगरी आइपीएल टीम सनराइजर्स हैदराबादबाट आइपीएलको उपाधि पनि जितेका छन् ।

उनले भारतका लागि टी२० अन्तर्राष्ट्रिय क्रिकेटमा ६६ खेलबाट १७५९ रन बनाएका छन् भने सबैखाले टी२०मा ३३४ खेल खेल्दा २ शतक र ७० अर्धशतकसहित ९७९७ रन बनाएका छन् । आइपीएलमा मात्र उनको ६७६९ रन छ ।

उनले आइपीएलमा दिल्ली क्यापिटल्स, डेक्कन चार्जर्स, सनराइजर्स हैदराबाद र पञ्जाब किङ्सबाट खेलिसकेका छन् भने भारतबाहिर यो उनको पहिलो फ्रेन्चाइज लिग हुनेछ ।

हुसेन तलात

पाकिस्तानका खेलाडी तलात अलराउण्डरको भूमिकामा खेल्ने गर्छन् । बाँयाहाते ब्याटिङ गर्ने उनले पाकिस्तानबाट १८ टी२० अन्तर्राष्ट्रिय खेल खेल्दा ३९४ रन बनाएका छन् भने सबैखाले टी२०मा १६९ खेल खेल्दा १८ अर्धशतकसहित ३२८४ रन बनाएका छन् ।

त्यस्तै दाँयाहाते मिडियम पेस बलिङ गर्ने उनले ५८ विकेट पनि लिएका छन् । उनले दक्षिण अफ्रिकाको एमजान्सी सुपर लिग तथा पाकिस्तान सुपर लिग खेलेका छन् ।

तलातले यसअघि पनि नेपालमा आएर टी२० क्रिकेट खेलिसकेका छन् । सन् २०२२ मा भएको नेपाल टी२० लिगमा उनले विराटनगर सुपर किंग्सबाट खेलेका थिए ।

बाबर हायात

हङकङका विस्फोटक ब्याटर बाबर हायात नेपाल र नेपाली क्रिकेट लिगमा परिचित नाम हो । हङकङको टोलीबाट पनि धेरैपटक नेपाल आएर खेलिसकेका दाँयाहाते ब्याटर हायातले यसअघि नेपाली लिगहरू पनि खेलिसकेका छन् ।

हायातले हङकङका लागि टी२० अन्तर्राष्ट्रियमा ७९ खेलबाट २ शतकसहित १९१० रन बनाएका छन् भने सबैखाले टी२०मा १०५ खेलमा २३९८ रन बनाएका छन् ।

उनले यसअघि नेपालका लिगहरूमध्ये पोखरा प्रिमियर लिग, एभरेस्ट प्रिमियर लिग, धनगढी प्रिमियर लिग खेलिसकेका छन् भने क्यानडाको ग्लोबल टी२० लिग पनि खेलेका छन् ।

चाडविक वाल्टन

वेस्ट इन्डिजका विकेटकिपर ब्याटर वाल्टनले दाँयाहाते ब्याटिङ गर्छन् । उनले वेस्ट इन्डिजका लागि टी२०आईमा १९ खेल खेल्दा २२५ रन बनाएका छन् भने सबैखाले टी२० मा १८८ खेलमा ३५७८ रन बनाएका छन् ।

वाल्टनले यसअघि पनि नेपालमा आएर टी२० क्रिकेट खेलिसकेका छन् । सन् २०२२ मा भएको नेपाल टी२० लिगमा उनले जनकपुर रोयल्सबाट खेलेका थिए ।

उनले बङ्गलादेश प्रिमियर लिग, श्रीलंका प्रिमियर लिग, क्यारेबियन प्रिमियर लिग, पाकिस्तान सुपर लिग, ग्लोबल टी२० लिगजस्ता विश्वका धेरै फ्रेन्चाइज लिगहरू खेलिसकेका छन् ।

– यस समाचारको श्रोत : Online Khabar हो ।