आईसीसी यू-१९ महिला टी २० विश्वकप छनोटमा थाइल्याण्डसँग खेल्दै नेपाल
२१ कात्तिक, काठमाडौं । आजदेखि युएईमा सुरु हुने आईसीसी यू-१९ महिला टी२० विश्वकप एसिया छनोटमा नेपालले आप्नो पहिलो खेलमा आज थाइल्याण्डसँग खेल्दैछ । खेल नेपाली समय अनुसार दिउँसो सवा ३ बजे दुबईस्थित सेभेन्स मैदानमा सुरु हुनेछ ।
चार टोली सहभागी छनोट प्रतियोगितामा नेपाल थाइल्याण्डलाई हराउँदै सुखद सुरुवात गर्ने लक्ष्यमा छ । यसअघि यी दुई टोली सन् २०२२ मा पनि एसिया क्षत्रेकै छनोटमा भिडेका थिए । जहाँ थाइल्याण्डले नेपाललाई ४९ रनले पराजित गरेको थियो ।
नेपाल र थाइल्याण्डसँगै युएई र कुवेत सहभागी छनोटका खेलहरु डबल राउण्ड रोबिनका आधारमा खेलाइनेछ । त्यसपछि शीर्ष स्थानमा रहने टोली अर्को वर्ष मलेसियामा हुने यू-१९ महिला टी-२० विश्वकपमा छनोट हुनेछ ।
उक्त विश्वकप खेल्ने १६ टोलीमध्ये १५ टोलीको टुंगो लागिसकेको छ । जसमा अघिल्लो संस्करणका शीर्ष १० टोली, आयोजक मलेसिया अनि क्षेत्रीय छनोट जितेका नाइजेरिया, सामोअ, स्कटल्याण्ड र अमेरिका छन् । अमेरिका क्षेत्रमा भने अन्य कुनै टिम नभएकाले अमेरिका छनोट नखेली स्वत: विश्वकप खेल्न छानिएको हो ।
यसअघि पनि नेपालले यू१९ महिला टी२० विश्वकपको एसिया छनोट खेलेको थियो । जहाँ युएई र थाइल्याण्ड भन्दा पछि तेस्रो स्थानमा रहेपछि नेपाल यू-१९ विश्वकपमा पुग्न सकेन ।
सिनियर राष्ट्रिय टिमकी अलराउण्डर पूजा महतोको कप्तानीमा रहेको नेपाली युवा टोलीले यस पटक राम्रो प्रदर्शन गर्ने लक्ष्य राखेको छ ।
– यस समाचारको श्रोत : Online Khabar हो ।