बार्सिलोना ओसासुनासँग स्तब्ध

१३ असोज, काठमाडौं । स्पानिस ला लिगाको नयाँ सिजन सानदार सुरुवात गर्दै लगातार ७ खेल जितेको बार्सिलोनाको अपराजित यात्रामा ओसासुनाले ब्रेक लगाएको छ । लिगअन्तर्गत गएराति भएको खेलमा बार्सिलोना ओसासुनासँग ४-२ ले स्तब्ध बन्यो ।
यस सिजन बार्सिलोनाको यो पहिलो हार हो ।
घरेलु मैदानमा ओसासुनालाई जित दिलाउन एन्टे बुडिमिरले दुई तथा ब्राएन जारागोजा र अबेल ब्रेटोनेसले एक एक गोल गरे ।
बार्सिलोनाका लागि पाउ भिक्टोर र लामिन यामलले गोल गरे ।
खेलको १८औं मिनेटमा बुडिमिरले गोल गर्दै ओसासुनालाई अग्रता दिलाएका थिए भने जारागोजाले २८औं मिनेटमा ओसासुनाको अग्रता दोब्बर पारे ।
दोस्रो हाफमा भिक्टोरले गोल गर्दै बार्सिलोनालाई खेलमा फर्काउने प्रयास गरेका थिए । ५३औं मिनेटमा भिक्टोरले गोल गरेपछि खेल २-१ को स्थिमीमा पुगेको थियो ।
तर, त्यसपछि ओसासुनाले लगातार दुई गोल गर्यो । बुडिमिरले ७२औं मिनेटमा व्यक्तिगत दोस्रो गोल गरेपछि ओसासुनाले ३-१ को अग्रता बनायो भने ब्रेटोन्सले ८५औं मिनेटमा गोल गर्दै ओसासुनाको अग्रता ४-१ पुर्याए ।
८९औं मिनेटमा यामलले फेरान टोरेसको पासमा गोल गर्दै गोल अन्तर घटाएपनि बार्सिलोनालाई हार टार्न पर्याप्त भएन ।
पहिलो हारपछि पनि बार्सिलोना अंकतालिकाको शीर्ष स्थानमै आसिन छ । बार्सिलोनाको हारले दोस्रो स्थानको रियल मड्रिड र तेस्रो स्थानको एट्लेटिको मड्रिडलाई फाइ पुगेको छ । ७ खेल खेलेका रियल १७ अंकसहित दोस्रो र एट्लेटिको १५ अंकसहित तेस्रो स्थानमा छ ।
– यस समाचारको श्रोत : Online Khabar हो ।