बढुवाको झण्डै एक वर्षपछि डा.श्रवण नायकको पदस्थापन

२७ कार्तिक, जनकपुरधाम । बढुवाको झण्डै एक वर्षपछि डा.श्रवणकुमार नायकलाई मधेश सरकारले पदस्थापन गरेको छ ।

मधेश सरकारको सोमबार बसेको मन्त्रिपरिषदको बैठकले एघारौं तहमा बढुवा भएका डा. नायकलाई मधेश स्वास्थ्य निर्देशनालयको प्रमुखमा पदस्थापन गर्ने निर्णय गरेको हो ।

सो निर्णय बमोजिम मुख्यमन्त्री कार्यालयले उनलाई मंगबार निर्देशनालय प्रमुखमा पदस्थापन गरेको हो । आफ्नो आज निर्देशनालयको प्रमुख पदमा पदस्थापन भएको र पत्र बुझ्न आधिकारिक जानकारी आएको नायकले बताए । लामो संघर्ष र मिहिनेतपछि आफूले न्याय पाएको उनको भनाइ छ ।

स्वास्थ्य सेवा समूह हेल्थ इन्स्पेक्सन एघारौं तहका नायकको दरबन्दी भएको कार्यालय मधेश स्वास्थ्य निर्देशनालय नै हो ।

१६ मंसिर २०८० मा स्वास्थ्य सेवाको एघारौं तहमा बढुवा भएका नायकलाई झण्डै ५ महिनादेखि मुख्यमन्त्री कार्यालयमा तलबभत्ता खाने गरी सरकारले थन्काएको थियो ।

बढुवाको ७ महिनासम्म स्वास्थ्य निर्देशनालयका वरिष्ठ जनस्वास्थ्य प्रशासक डा. नायकले आफूभन्दा कनिष्ट डा. राजीवकुमार झा मातहतमा काम गर्नु परेको थियो । जबकी मधेश प्रदेश निजामती सेवा ऐन २०७७ को दफा ३७ को उपदफा १ मा बढुवा उपर उजुरी नपरे १६ औं दिनमा नियुक्ति गरिसक्नु पर्ने कानुनी प्रावधान छ ।

बढुवा अनुसार नियुक्ति र पदस्थापनको लागि नायक धेरै पटक मधेशका तत्कालीनु मुख्यमन्त्री सरोजकुमार यादव, वर्तमान मुख्यमन्त्री सतिशकुमार सिंह, प्रमुख सचिव, स्वास्थ्यमन्त्री र मुख्यमन्त्री गुहारेका थिए । तर उनलाई कसैले वास्ता गरेनन् । कनिष्टको मातहतमा काम गर्न र थन्किन बाध्य भए ।

जनमत पार्टीका सतिशकुमार सिंह मुख्यमन्त्री बनेको करिब एक महिनापछि २० असारमा मन्त्रिपरिषद बैठकले नायकलाई निर्देशनालयको निर्देशकमा नियुक्ति गरेको थियो । तर पदस्थापन नगरी जिम्मेवारी विहीन बनाएर मुख्यमन्त्री कार्यालयमा थन्काएका थिए ।

– यस समाचारको श्रोत : Online Khabar हो ।