आफ्नो फोटो र सिग्नेचर राखेर अनलाइन जुवाको प्रचार गरिएपछि स्वस्तिमाको आपत्ति

काठमाडौं । आफूलाई व्यावसायिक दूत बनाएको दाबी गर्दै एक गेमिङ एपले विज्ञापन गरेपछि अभिनेत्री स्वस्तिमा खड्काले आपत्ति जनाएकी छन् । फेसबुकमा स्टाटस लेख्दै उनले उक्त अवैध प्लाटफर्ममा आफ्नो नाम र तस्वीर दुरुपयोग भएको जनाएकी हुन् ।

‘मलाई ब्रान्ड एम्बास्डरको रूपमा अनुबन्ध गरिएको भन्दै एक गेमिङ एपले सामाजिक सञ्जालमा विज्ञापन गरिरहेको छ’, स्वस्तिमाले लेखेकी छिन्, ‘म यस्ता गैरकानुनी एपबाट कोसौं टाढा छु । यस्ता पोस्टहरू देख्नुभयो भने रिपोर्ट गरिदिनुहोला ल ।  नेपाल प्रहरीले कारबाही गर्नेछ भन्ने विश्वासमा छु ।’

उनले भ्रामक प्रचार गर्नेलाई कारवाही गर्न नेपाल प्रहरीलाई समेत आग्रह गरेकी छन् । स्वस्तिमाको तस्वीर दुरुपयोग गर्ने प्लाटफर्मले आफ्नो कम्पनीको नाम ‘हिमा ८ एनपी’को भएको दाबी गरेको छ ।

सन् २०२४ का लागि स्वस्तिमालाई ब्रान्ड एम्बास्डर नियुक्त गरेको भन्दै नक्कली पोस्ट राखिएको छ । यतिसम्म कि पोस्टमा स्वस्तिमाको नक्कली सिग्नेचर गरेको पनि देखाइएको छ ।

– यस समाचारको श्रोत : Online Khabar हो ।