आर्थिक वर्षको अन्त्यमा १२ प्रतियोगिता गर्दै प्रदेश विकास बोर्ड
२३ जेठ, विराटनगर । चालु आर्थिक वर्षका लागि छुट्याएको बजेट खर्च गर्नका लागि प्रदेश खेलकुद विकास बोर्डले १२ वटा प्रतियोगिता गर्ने तयारी गरेको छ । बुधबार पत्रकार सम्मेलन गर्दै बोर्डले ती प्रतियोगिता १५ असार भित्र सक्ने गरी विभिन्न १२ वटा प्रतियोगिता गर्ने बताएको छ ।
प्रदेश खेलकुद विकास बोर्डका सदस्यसचिव कृष्ण बस्नेत (पर्शुराम)ले चालु आर्थिक वर्ष २०८०- ०८१ मा प्रदेश खेलकुद विकास बोर्डमार्फत कार्यान्वयन हुने खेलकुद सम्बन्धी कार्यक्रम प्रदेशका १४ वटै जिल्लालाई समेटेर गर्ने बताए ।
उनका अनुसार प्रदेशस्तरीय पुरुष फुटबल प्रतियोगिता असार ३ देखि ७ गतेसम्म तेह्रथुममा हुनेछ । कबड्डी प्रतियोगिता असार ७ देखि १० गतेसम्म मोरङमा, महिला फुटबल असार ८ देखि १३ गतेसम्म खोटाङमा, शरीरिक सुगठन असार १० देखि १२ गतेसम्म झापामा र भारोत्तोलन असार १३ देखि १५ गतेसम्म विराटनगरमा हुनेछ ।
मुख्यमन्त्री कप राष्ट्रिय भलिबल प्रतियोगिता मोरङमा, प्रदेशस्तरीय पौडी प्रतियोगिता सुनसरी र मोरङमा, महिला ‘सेल्फ डिफेन्स’ (आत्मरक्षा) तथा योगा प्रशिक्षण झापा, मोरङ र सुनसरीका ३ वटा विद्यालयमा हुनेछ ।
फरक क्षमता (अपांगता) भएकाहरुले खेल्ने पारा खेलकुदमध्ये क्रिकेट र पौडी प्रतियोगिता विराटनगरमा र बास्केटबल धरानमा हुने छ । कोशीमा खेलकुद प्रतियोगिता आयोजनाका लागि १ करोड ६ लाख रूपैयाँ बजेट छुट्याइएको छ ।
कोशी प्रदेशमा केही समयदेखि रोकिएका खेलकुदका प्रतियोगित असार दोस्रो साताभित्रमा सक्ने गरी तयारी थालिएको बस्नेतले बताए । बजेट ‘फ्रिज’ हुनबाट रोक्नका लागि ‘फास्ट ट्रयाक’बाट प्रतियोगिता आयोजना गर्न लागिएको उनकाे भनाइ छ ।
– यस समाचारको श्रोत : Online Khabar हो ।