चितवन मेडिकल कलेजमा महिलाहरुको निःशुल्क क्यान्सर परीक्षण
२१, असोज, चितवन । क्यान्सर सचेतना महिनाको सन्दर्भ पारेर चितवन मेडिकल कलेजले महिलाहरुको निशुल्क क्यान्सर परीक्षण सुरु गरेको छ ।
आइतबारदेखि तीन दिनसम्म चल्ने परीक्षणमा क्यान्सर जोखिम उमेरका महिलाहरुको निशुल्क परीक्षण गर्ने अस्पतालका निर्देशक डा. दयाराम लम्सालले जानकारी दिए ।
उनका अनुसार ३५ वर्षमाथिका महिला पत्रकार, महिला स्वास्थ्य स्वंयसेविका, स्वास्थ्य सेवामा कार्यरत महिला कर्मचारीहरुको क्यान्सर परीक्षण गरिनेछ ।
महिलाहरुमा पाठेघर र स्तनको क्यान्सरको जोखिम उच्च हुने भएकाले क्यान्सर स्क्रिनिङका रुपमा परीक्षण गर्न लागिएको हो ।
पछिल्लो समयमा पाठेघरको मुखको क्यान्सर भन्दा बढी स्तनको क्यान्सर देखिन थालेकोले जोखिम उमेर समूहका महिलाहरुलाई लक्षित गरिएको डा. लम्सालले बताए ।
उनले रगतको जाँच, पाठेघरको मुखको भीआइए परीक्षण, तथा स्तनको भिडियो एक्सरे गरिने बताए । पाठेघरको मुखको ‘भीआइए’ पोजेटिभ आएकाहरुका लागि सर्भाइकल बायोप्सी परीक्षण गरिने डा. लम्सालले जानकारी दिए ।
समाजमा सचेतना फैलाउनका लागि यस्ता अभियान चलाइएको उनको भनाइ छ ।
– यस समाचारको श्रोत : Online Khabar हो ।