बदलिएको परिवेश

आँखामा तिरमिर तिरमिर विगतका चित्रहरू,

आज टिलपिल टिलपिल गर्दैछन् सम्झनाभरि,

हिजो मान्छेहरु नअट्ने घरका भित्तामा,

आज माकुराका जालो मात्र देखिन्छन्,

हिजो बिहे जमघट र मेलामा गाउँ ढाक्ने मान्छेहरु,

आज मलामी पर्दा भेटिदैनन्,

उजाड उजाड छन् घरहरु,

उजाड उजाड छन् बस्तीहरु,

बाँदर, बँदेल, दुम्सी र नीलगाईहरु बस्ति पसेका छन्,

धान झुल्ने गैह्रीखेत,

कि त बगर बनेको छ,

कि त झाडीमा बदलिएको छ,

खै कहाँ छन् उँखु र मकैबारी ?

फल्नै नपाएका तोरीबारी,

श्रमिकको पर्खाइमा छन्

मुजुरा, मादल अनि डम्फुका धुनहरूले

खोजिरहेछन् पुरानै सिपालु हातहरू,

देउसी, भैलो, झ्याउरेका भाकाहरुले

पर्खिरहेछन् रैथाने कला र गलाहरू,

छैन काका काकी सानीमाका मृदुल माया,

टाढिएका छन् नाता र सम्बन्धहरू,

एक्लै एक्लो छ मान्छेहरू,

एउटै घरभित्रसँगै भएर पनि

पतिले पत्नीलाई शुभकामना दिन्छ फेसबुकको भित्तामा,

बिरानो भएका छन्

आफ्नै बारीमा फल्ने अनाजहरू,

मःमः, चाउमिन र पिजा भित्रन्छन् घर भित्र

पाँच बीस बाच्दा पनि रोग नजान्ने

हिजोको मान्छे

आज डेढ बिस नकट्दै लिन थाल्छ

दीर्घ रोगको ओखति

बदलिएको छ परिवेश

बदलिएको छ मान्छे

अब के बदलिनु पर्ने होला ?

यो सब बदलिएको बदलेर,

उही पुरानो गाउँ बन्न,

उही पुरानो मान्छे बन्न,

उही पुरानो सम्बन्ध बन्न ।

– यस समाचारको श्रोत : Online Khabar हो ।