सुरशाला म्युजिक एकेडेमीको नयाँ शाखा काठमाडौंको विशालनगरमा

काठमाडौं । सुरशाला म्युजिक एकेडेमीले काठमाडौंको विशालनगरमा नयाँ शाखा सञ्चालनमा ल्याएको छ । गायक तथा संगीतकार अमृत क्षेत्री र उनकी श्रीमती संगीता क्षेत्रीले सञ्चालन गरिरहेको एकेडेमीले बुधबार सरस्वती पूजाको अवसर पारी दोस्रो शाखा सञ्चालनमा ल्याएको हो । ललितपुरको झम्सिखेलमा मुख्य कार्यालय रहेको सुरशालाले यसअघि काठमाडौंको पेप्सीकोलामा पहिलो शाखा सञ्चालनमा ल्याइसकेको छ ।

विशालनगरस्थित शाखाको गायक रामकृष्ण ढकाल, हेमन्त शर्मा, गायिका रेखा शाह, प्राश्ना शाक्यलगायतले शुभारम्भ गरे । त्यस अवसरमा गीत-संगीतसमेत प्रस्तुत गरिएको थियो ।

१९ वर्षदेखि संगीतसम्बन्धी प्रशिक्षण दिंदै आएको सुरशालामा बालबालिकादेखि प्रौढ उमेरसम्मका विद्यार्थीले संगीत प्रशिक्षण लिंदै आएका छन् । ६ महिनादेखि तीन वर्षसम्मको संगीत तथा नृत्य कक्षा सञ्चालन हुने यो एकेडेमीमा व्यावसायिक संगीत शिक्षकबाट गायन, बाद्यवादन, नृत्यलगायत विधामा प्रशिक्षण दिइने गरिएको सुरशालाका प्रबन्ध निर्देशक अमृत क्षेत्रीले बताए ।

सुरशालामा भौतिक र अनलाइन दुवै माध्यमबाट संगीत कक्षा लिन सकिने व्यवस्था छ । ‘धेरै अभिभावकज्यूहरुले आफ्ना बालबालिकालाई संगीत सिकाउन चाहेपनि समय अभावका साथै टाढा हुँदा सिकाउन नपाएको गुनासो गरिरहनुभएको हुन्छ । त्यसैलाई मध्यनजर गरी सुरशालाको शाखा विस्तार गरेका हौं । एकेडेमीसम्म आउन समय नहुने, काठमाडौं बाहिर र विदेशमा हुनेहरुले अनलाइन कक्षा लिने गर्नुभएको छ,’ क्षेत्रीले अनलाइनखबरसँग भने ।

प्रबन्ध निर्देशक क्षेत्रीका अनुसार सुरशाला एकेडेमीबाट हालसम्म १२ सय भन्दा बढीले संगीत प्रशिक्षण लिएका छन् भने हाल २०० भन्दा बढी विद्यार्थीले संगीत कक्षा लिइरहेका छन् ।

सुरशालाले नेपालमा पहिलो बाल गायन प्रतियोगिता ‘सुरशाला आइडल जुनियर’ आयोजना गरेको थियो ।

– यस समाचारको श्रोत : Online Khabar हो ।