ई स्पोर्ट्सको वार्षिक क्यालेन्डर सार्वजनिक

९ साउन, काठमाडौं । ई स्पोर्ट्स संघ नेपाल (ईसान) ले वार्षिक क्यालेन्डर सार्वजनिक गरेको छ । ईसानले मंगलबार पत्रकार सम्मेलनको आयोजना गरेर चालु आर्थिक वर्षको वार्षिक क्यालेन्डर सार्वजनिक गरेको हो ।

संघले चालु आर्थिक वर्षमा कलेज प्रतियोगितादेखि प्रदेश, राष्ट्रिय र अन्तराष्ट्रियस्तरका कार्यक्रम आयोजना र सहभागिता जनाउने जनाएको छ ।

सार्वजनिक क्यालेन्डर अनुसार इन्टर कलेज च्याम्पियनसिप भदौमा, बागमती च्याम्पियनसिप असोजमा, थाइल्याण्डमा मंसिरमा हुने एसिया मार्सल आर्ट एण्ड इन्डोर गेम्समा सहभागिता हुने, ईसानको राष्ट्रिय च्याम्पियनसिप माघमा, ई स्पोर्ट्स अवार्ड चैतमा, एसियन ई स्पोर्ट्स चैत/बैशाखमा र कोशी च्याम्पियनसिप आसन्न जेठमा सञ्चालन गर्ने तालिका छ ।

संघका अध्यक्ष अन्जन धमलाले खेल र खेलाडी विकासको मुख्य आधार नै सम्बन्धित खेलको व्यवस्थित क्यालेन्डर रहेको उल्लेख गर्दै खेलाडीलाई पर्याप्त प्रतियोगिता दिन संघ प्रतिबद्ध रहेको बताए । उनले ई स्पोर्ट्सबारे नेपाली समाजमा केही भ्रमपूर्ण बुझाइ रहेको पनि बताए ।

संघका उपाध्यक्ष पुरन केसीले पछिल्लो एसियन गेम्समा समावेश पब्जी, एमएल, डोटा, अनर अफ किंग्स, ई फुटबल लगायतलाई खेललाई क्यालेन्डरमा प्राथमिकतामा राखिने बताए । उनले संघीय सरकार, प्रदेश सरकार, स्थानीय सरकार तथा नीजि तथा विभिन्न संघ, संस्थाको सहयोगमा क्यालेन्डरको सफल कार्यान्वयन गरिने प्रतिबद्धता व्यक्त गरे ।

आधुनिक प्रविधिमा आधारित खेल विधाको रुपमा रहेको ई स्पोर्ट्सको क्षेत्रमा काम गर्ने गरि सरकारले बनाएको ई स्पोर्ट्स संघ नेपालले स्थापनाको तेस्रो महिनामै गत असारमा कर्णाली प्रदेशको सुर्खेतमा पहिलो राष्ट्रिय च्याम्पियनसिपको आयोजना गरेको थियो ।

– यस समाचारको श्रोत : Online Khabar हो ।