उखुले रोक्यो विदेश यात्रा
१९ चैत, कञ्चनपुर । गर्मी बढेसँगै कञ्चनपुरको भीमदत्त नगरपालिका–१८ सालघारीका ३० वर्षीय नीमबहादुर चौधरीलाई उखुको जुस बेच्न भ्याइनभ्याइ हुन थालेको छ । जाडोको तुलनामा फागुन दोस्रो सातायता चौधरीको दैनिकी थप व्यस्त बनेको छ ।
भीमदत्त–४ महेन्द्रनगरमा नीमबहादुरले उखु पेलेर जुस बेच्ने काम गरेर राम्रो आम्दानी गरिरहेका छन् । ३ सदस्यीय परिवारको घरखर्च उनकै आम्दानीमा चलेको छ । खर्च कटाएर दैनिक १ हजार ५ सयभन्दा बढी बचत हुने गरेको उनको भनाइ छ ।
‘गर्मीयाम सुरू भएकाले उखुको जुस सबैको रोजाइमा पर्छ, दैनिक दुई हजार ५ सयदेखि ३ हजार रुपैयाँको कारोबार भइरहेको छ,’ उनले भने, ‘स्वदेशमै ठीकै आम्दानी भएपछि विदेश जानुपर्ने बाध्यता आएको छैन ।’
४० रुपैयाँ प्रतिगिलासका दरले उखुको जुस बिक्री हुने गरेको उनको भनाइ छ । ‘प्रत्येक दिन बिहान उखु किनेर ल्याउँछु, बेलुका त्यो उखु सकिन्छ,’ नीमबहादुरले भने, ‘प्रतिक्विन्टल १ हजारमा उखु पाइन्छ ।’
उनले ९३ हजार रुपैयाँमा उखु पेल्ने मेसिन किनेर यो व्यवसायमा हात हालेका थिए । यो व्यवसायमा आउनुअघि उनलाई विदेश जाने सोच आएको थियाे । तर एकपटक आफ्नै देशमा केही गरौं भनेर व्यवसायमा आएको उनले बताए । ‘अर्काको देशमा दुःख गर्नुभन्दा आफ्नै ठाउँमा सानै भए पनि व्यवसाय गर्ने सोच बनाएँ,’ उनले भने ।
यसअघि नीमबहादुरले घर बनाउने मिस्त्रीको काम गर्थे । ‘कोरोनापछि मिस्त्री काम धेरै कम पाइन थाल्यो, मिस्त्री कामले गुजारा चल्लाजस्तो भएन,’ उनले भने, ‘त्यही भएर विदेश जानुभन्दा यहीं केही गर्छु भनेर यो व्यवसायमा लागेको हुँ ।’
– यस समाचारको श्रोत : Online Khabar हो ।