उत्कृष्ट सुरुवातका बाबजुद बागमतीले गण्डकीलाई दियो १९९ रनको लक्ष्य
९ माघ, काठमाडौं । ओपनर आशुतोष घिरैया र ईशान पाण्डेको उत्कृष्ट सुरुवातका बाबजुद बागमती प्रदेशले प्रधानमन्त्री कप एकदिवसीय राष्ट्रिय प्रतियोगितामा गण्डकी प्रदेशलाई १९९ रनको मध्यम लक्ष्य दिएको छ ।
त्रिवि क्रिकेट मैदानमा टस जितेर पहिला ब्याटिङ रोजेको बागमती ४९.१ ओभरमा १९८ रनमा अल आउट भयो ।
एक समय २०.१ ओभरमा ९०–० को बलियो अवस्थामा रहे पनि गण्डकीका स्पिनर सामु कमजोर प्रदर्शन गरेपछि बागमतीले बलियो योगफल बनाउने अवसर गुमाएको हो ।
ओपनर आशुतोष घिरैयाले ६९ बलमा ५ चौकासहित सर्वाधिक ४४ रन बनाए । ईशान पाण्डेले ६२ बलमा २ चौका र २ छक्कासहित ४३ रन बनाए । अन्य कुनै पनि बागमतीका ब्याटरले राम्रो प्रदर्शन गर्न सकेनन् ।
बागमतीलाई ओपनर आशुतोष घिरैया र ईशान पाण्डेले २०.२ ओभरमा ९० रनको साझेदारी गर्दै उत्कृष्ट सुरुवात दिलाएका थिए । स्पिनर कमल परियारले आशुतोषलाई एलबीडब्लू आउट गर्दै पहिलो सफलता दिलाए ।
कमलको २३ औं ओभरको पाँचौं बलमा ईशान पाण्डे स्टेटमा कृष ऐरबाट उत्कृष्ट क्याच आउट भए ।
त्यसपछि गण्डकीका तीन स्पिनर कमल, सन्दीप पराजुली र विपिन खत्रीले खेलमा फर्काएका थिए ।
कप्तान रित गौतम १३, रविन जोशी डक, अशोक पौडेल ३०, विपिन आचार्य ३८, प्रतिश जि.सी २ र सूर्य तामाङले १५ रन बनाए । गण्डकीका कमल परियारले १० ओभरमा १ मेडनसहित ३१ रन खर्चेर ४ विकेट लिए ।
विपिन खत्रीले १० ओभरमा २ मेडनसहित २७ रन खर्चेर २ विकेट लिए । अमृत गुरुङ २ र सन्दीप पराजुलीले १ विकेट लिए । गण्डकी ४ खेलमा १ मा जित र ३ मा हारसहित २ अंकका साथ आठौं स्थानमा छ । बागमती ६ खेलमा ४ मा जित र २ मा हारसहित ८ अंकका साथ दोस्रो स्थानमा छ ।
– यस समाचारको श्रोत : Online Khabar हो ।