उदय सुब्बाको नेतृत्वमा अखिल नेपाल चलचित्रकर्मी संघको नयाँ कार्यसमिति
काठमाडौं । सत्तारुढ माओवादी केन्द्र निकट अखिल नेपाल चलचित्रकर्मी संघको नयाँ कार्यसमिति चयन भएको छ । आइतबार काठमाडौंमा सम्पन्न चौथो राष्ट्रिय सम्मेलनले उदय सुब्बाको नेतृत्वमा नयाँ कार्यसमिति चयन गरेको हो ।
संघको उपाध्यक्षमा रामेश्वर बुर्लाकोटी, भूपेन्द्र खड्का, विराज थपलिया, केएल पीडित र हिक्मत थपलिया छन् । महासचिवमा किसान पोखरेल, सचिवमा प्रेम पाण्डे, गोपीलाल तामाङ, हेमराज घर्ती र राजकुमार लिङ्देन छन् । कोषाध्यक्षमा सुष्मा कार्की र सहकोषाध्यक्षमा सागर सुब्बा चयन भएका छन् ।
सम्मेलनका प्रमुख अतिथि तथा नेकपा माओवादी केन्द्रका उपमहासचिव जनार्दन शर्माले फिल्म क्षेत्रलाई पार्टीले विशेषरुपमा हेरेको बताए । आगामी बजेटमा फिल्मलाई समेटिएको भन्दै शर्माले करोडौंका फिल्म बनाउनुभन्दा साना खालका मौलिक बनाएर अन्तर्राष्ट्रिय बजारमा लैजान सकिने बताए ।
जनयुद्धकालीन कथालाई समेटेर फिल्म बनाउन उनले आग्रह गरे । साथै, पार्टीलाई समाजमा नकारात्मक रुपमा चित्रण गरिएकाले त्यसलाई चिर्नेगरी फिल्म बनाउन समेत उनले आग्रह गरे ।
सम्मेलनमा पार्टी केन्द्रीय सदस्य तथा चलचित्र विकास बोर्डका पूर्वध्यक्ष ईश्वरचन्द्र ज्ञवाली र चलचित्र क्षेत्रतर्फ पार्टीका इन्चार्ज चेतन सापकोटा पनि सहभागी थिए ।
– यस समाचारको श्रोत : Online Khabar हो ।