हिमालयन रिइन्स्योरेन्सको नाफा शत प्रतिशत बढ्यो

३० वैशाख, काठमाडौं । हिमालयन रिइन्स्योरेन्सले चालु आर्थिक वर्षको तेस्रो त्रैमासिक वित्तीय विवरण सार्वजनिक गरेको छ । सार्वजनिक वित्तीय विवरणअनुसार कम्पनीले चालु आर्थिक वर्षको तेस्रो त्रैमाससम्म ९३ करोड ११ लाख रुपैयाँ खुद नाफा कमाएको छ । कम्पनीको यो नाफा गत आवको यसै अवधिको तुलनामा दोब्बर अर्थात् शत प्रतिशत बढी हो ।

गत आवको यसै अवधिमा कम्पनीले ४६ करोड ४३ लाख रुपैयाँ खुद नाफा कमाएको थियो । प्रिमियम आम्दानी र लगानीवापतको आम्दानी बढ्दा कम्पनीको खुद नाफामा प्रभाव पारेको देखिन्छ । कम्पनीको खुद प्रिमियम आम्दानी गत आवको यस अवधिमा १ अर्ब ५५ करोड रुपैयाँ रहेकोमा अहिले ३ अर्ब ४९ करोड छ ।

त्यस्तै कर्जा तथा लगानीवापतको आम्दानी पनि बढेको छ । यस्तो आम्दानी गत आवको तेस्रो त्रैमासमा ५६ करोड ८ लाख रुपैयाँ रहेकोमा अहिले ७६ करोड ७२ लाख रुपैयाँ छ । कम्पनीको कुल खर्च पनि बढेको छ । यस्तो खर्च पहिले १ अर्ब ५७ करोड रहेकोमा अहिले २ अर्ब ९८ करोड पुगेको छ ।

खुद नाफा बढ्दा कम्पनीको प्रतिसेयर आम्दानी बढेको छ । कम्पनीको वार्षिक प्रतिसेयर आम्दानी १२ रुपैयाँ ४१ पैसा छ । गत आवको यसै अवधिमा यस्तो आम्दानी ८ रुपैयाँ ८४ पैसा थियो ।

कम्पनीको प्रतिसेयर नेटवर्थ १४९ रुपैयाँ ९७ पैसा छ । कम्पनीको वितरणयोग्य आम्दानी (रिटेन्ड अर्निङ) ७७ करोड ५० लाख रुपैयाँ छ । बिहीबार बजार बन्द हुँदा यस कम्पनीको साधारण सेयर मूल्य प्रतिकित्ता ५६० रुपैयाँ छ ।

– यस समाचारको श्रोत : Online Khabar हो ।