एसियाली र्याफ्टिङ च्याम्पियनसिपमा नेपाललाई रजत
२७ फागुन, काठमाडौं । भारतमा भएको एसियाली र्याफ्टिङ च्याम्पियनसिपमा नेपालले रजत जितेको छ ।
डाउन रिभर, स्लालम र हेड टु हेड गरी ३ विधा समावेश प्रतियोगितामा नेपाल समग्रमा दोस्रो भएको नेपाल र्याफ्टिङ एन्ड क्यानोइङ संघका अध्यक्ष राजीव श्रेष्ठले जनाएका छन् ।
नेपाल हेड टु हेडमा १ सय २०, स्लालममा ८० र डाउन रिभरमा ६० गरी जम्मा २ सय ६० अंक जोड्दै समग्रमा दोस्रो भएको हो ।
नेपाल हेड टु हेडमा पहिलो, स्लालममा दोस्रो, डाउन रिभरमा चौथो भएको थियो । नेपाली खेलाडीमा सविन गुरुङ, शक्तिकुमार गुरुङ, विजय गुरुङ, डम्बरबहादुर पुर्वाछाने र दीपेश पुन मगर रहेका छन् ।
विश्व र्याफ्टिङ महासंघको आयोजना तथा भारतीय फाउन्डेसनको तत्वावधानमा भएको भारतको हिमाचल प्रदेशस्थित सिम्लामा भएको प्रतियोगितामा भारत बेल्गाउँ २ सय ७० अंकसाथ पहिलो तथा भारत राइभोला २ सय ४८ अंकसाथ तेस्रो स्थानमा रहे ।
यही मार्च ३ देखि भएको प्रतियोगितामा अफिसियलमा संघका कोषाध्यक्ष महेश थापा र प्रशिक्षकमा भीष्मराज थपलिया टिमसँग गएका थिए ।
– यस समाचारको श्रोत : Online Khabar हो ।