पुरुषोत्तम सिलवालको उत्कृष्ट प्रदर्शन
२० जेठ, काठमाडौं । नेपाल बुद्धिचाल महासंघ र लुम्बिनी इभेन्ट म्यानेजमेन्टको संयुक्त आयोजनामा सञ्चालन भइरहेको राष्ट्रिय बुद्धिचाल प्रतियोगिताको तेस्रो चरणका खेल सम्पन्न भएका छन् ।
नेपालका उदीयमान खेलाडी पुरुषोत्तम सिलवालले गणेमान सिंह स्मृति चेस, नेशनल बी छनोट चेसमा झै यस राउन्ड रोविन प्रतियोगितामा पनि आफ्नो जीवनको उत्कृष्ट लयलाई निरन्तरता दिंदै तीन चरणको सबै खेलमा जित दर्ता गरेका छन् ।
पुरुषोत्तमले पहिलो खेलमा दोलखाका राजीव कार्की, दोस्रो चरणमा काभ्रेका पूर्व नेपाल च्याम्पियन क्षितिज भण्डारी र तेस्रो चरणमा काठमाडौंका अर्का पूर्व नेपाल च्याम्पियन केशव श्रेष्ठमाथि जित निकालेका छन् ।
सिलवालले २११२ रेटिङबाट खेल सुरु गरेका थिए भने हालसम्म ३६ रेटिङ वृद्धि गर्दै रेटिङ २१४९ पुर्याएका छन् । अपराजित उनी ३ अंकसहित एकल अग्रता बनाउँदै हंगेरीमा हुने ४५औं ओलम्पियाडको लक्ष्यतर्फ छन् ।
यसैगरी अर्का युवा खेलाडी एआईएम शुश्रुत दाहाल पनि दुई जित र एक खेल बराबर खेल्दै अपराजित दोश्रो स्थानमा रहन सफल बनेका छन् । उनले पहिलो चरणमा नेपाल च्याम्पियन एफएम रूपेश जैसवालसँग बराबरी गरेका थिए । २.५ अंक जोडेका दाहालले दोस्रो चरणमा झापाका राजन सुवेदी र तेस्रो चरणमा सिएम मिलनलामा माथि जित हात पारेका छन् ।
११ चरणको राउन्ड रविन खेलबाट नयाँ नेपाल च्याम्पियन छानिने दौडमा मिलन लामा, क्षितिज भण्डारी, झापाका राजन सुवेदी र प्रकाशचन्द्र नेपाल २/२ अंकका साथ संयुक्त तेस्रो स्थानमा उभिएका छन् ।
काठमाडौंका प्रेमकृष्ण महर्जन, ललितपुरका सुरोज महर्जन, धनुषाका सुशील चौधरी र राजीव कार्कीले १/१ अंक बनाएका छन् ।
प्रतियोगितामा खराब प्रदर्शन गरिरहेका वर्तमान नेपाल च्याम्पियन एफएम रूपेश जैसवाल दोस्रो चरणमा राजीव कार्की र तेस्रो चरणको खेलमा क्षितिज भण्डारीसँग पराजित भएका छन् ।
जैसवालको ५ अंक रहेको छ भने पूर्व च्याम्पियन केशव श्रेष्ठले खाता खोल्न सकेका छैनन् ।
महिलातर्फ ४ खेलाडको अग्रता
लुम्बिनी इभेन्ट म्यानेजमेन्टको व्यवस्थापनमा सञ्चालन भइरहेको ९औं वुमन नेसनल च्याम्पियनसिपमा पूर्वनेपाल च्याम्पियन सिन्दिरा जोशी, काठमाडौंका रिया श्रेष्ठ, मोरङका शान्ति धिमाल र कास्कीका पूजा भण्डारी ३/३ अंकका साथ संयुक्त अग्रस्थानमा रहन सफल भएका छन् ।
सिन्दिराले पर्साकी शुशीला गुरुङ र भक्तपुरका सविना गुजलाई निराश पारेकी थिइन् भने रियाले भक्तपुरकी प्रश्ना किबाजायो र काठमाडौंकी विनिता कपालीलाई जिते ।
राम्रो खेल प्रदर्शन गरिरहेकी शान्ति धिमालले श्रेषा दुवाल र शुशीलालाई हराए भने प्रश्ना र विनितामाथि जित दर्ता गर्न सफल बने । झापाकी पुनम प्रसाईं, झापाकै कृतिसरा अधिकारी २/२ अंकमा रही संयुक्त दोस्रो स्थानमा छिन् । यस्तै विनिता कपाली र शुशीला गुरुङको १/१ अंक रहेको छ ।
लुम्बिनी इभेन्ट म्यानेजमेन्टका अध्यक्ष सुवोधराज शेर्पालीले २४औं राष्ट्रिय बुद्धिचाल प्रतियोगिता सञ्चालन गर्न कुल अनुमानित खर्च १३ लाख ५० हजार रहेको छ । उक्त खर्च व्यवस्थापनका लागि विभिन्न कर्पोरेट हाउस, खेलकुदका अभिभावकीय निकाय, स्थानीय तह र अन्य दाता एवं सहयोगी संघ संस्थासँग समन्वय गरिएको जानकारी गराए ।
नेपाल बुद्धिचाल महासंघका वरिष्ठ उपाध्यक्ष तथा संयोजक दिपेन राईले २४औं राष्ट्रिय प्रतियोगिताको खुलातर्फ ३ जना र महिलातर्फ ४ जना छनोट भई हंगेरीको बुढापेस्टमा सेप्टेम्बर १०–२३ सम्म हुने ४५औं चेस ओलम्पियाडमा सहभागिता निश्चित गर्ने बताए ।
– यस समाचारको श्रोत : Online Khabar हो ।