भुटानविरुद्ध फिनिसिङमा चुक्यो नेपाल

३ कात्तिक, काठमाडौं । साफ वुमन्स च्याम्पियनसिपको इतिहासमै नेपाल पहिलो पटक भुटानसँग जित निकाल्न असफल हुँदा बराबरीबाट प्रतियोगिता सुरुवात गरेको छ ।

साफ वुमन्स च्याम्पियनसिप २०२४ अन्तर्गत दशरथ रंगशालमा शुक्रबार भएको खेलमा नेपालले भुटानसँग गोलरहित बराबरी खेल्दै अंक बाँडेको हो । ‘ गोल भएन ठूलो कुरा त्यही हो । गोल हुनुपर्ने भएन,’ खेलपछि नेपालका मुख्य प्रशिक्षक राजेन्द्र तामाङले सुरुमै पोष्ट म्याच कन्फ्रेन्समा भने ।

समूह बी मा रहेको नेपालको प्रतिद्वन्द्वी भुटान तुलनात्मक रुपमा कमजोर भए पनि पछिल्लो समय राम्रो गरिरहेको थियो । यद्यपि नेपालले भुटानलाई सहजै हराउने अनुमान थियो । तर, खेलको नतिजा भने त्यस्तो आउन सकेन ।

हुन त प्रतियोगिताअघि नै प्रशिक्षक तामाङले भुटानले सुधार गरिरहेको र हल्का रुपमा नलिने बताइसकेका थिए । तर, उनी पनि खेल जित्नेमा भने आशावादी थिए । मैदानमा खेलाडीको प्रदर्शनले भने नेपाललाई जिताउन सकेन ।

‘दुर्भाग्य थियो गोल भएन । तर, विश्व फुटबल नै यस्तै हो । भुटानले राम्रो तयारी गरेर आएको छ भनेर मैले पहिले पनि भनेको थिएँ । एक अंक पायौँ ठिकै छ ।’

मिडफिल्ड राम्रोसँग नचल्नु र फरवार्डका खेलाडीहरु गोल गर्न हतारिनु गोल गर्न नहुनुको कारण रहेको तामाङले बताए । ‘मिडफिल्डमा ध्यान दिनुपर्ने त्यो भएन । खेलाडीहरु सुरुमै गोल गर्न हतारिए । मिडफिल्डले मुख्य खेल कन्ट्रोल गर्नुपर्ने त्यो नभएपछि फरवार्ड पनि कन्ट्रोल भएन,’ उनले भने ।

पहिलो खेल भएकोले नेपाली खेलाडीहरुबीच सुरुमै तालमेलको कमी प्रष्टै देखिएको थियो । सायद सावित्रा बिना प्रशिक्षकले नयाँ रणनीति प्रयोग गर्न खोजेका थिए तर मैदानमा भने त्यसले खासै काम गरेन ।

यस्तै नेपाली टिमका दुई प्रमुख खेलाडी हिरा कुमारी भुजेल र दीपा शाही खेल दौरान घाइते हुँदै मैदान छाड्न बाध्य भए । उनीहरुको चोटको अवस्था हेर्दा साफ च्याम्पियनसिपका बाँकी खेलहरु नै गुमाउने सम्भावना रहेको प्रशिक्षक तामाङले बताएका छन् ।

साफ च्याम्पियनसपमै पहिलो बराबरी

यसमा केही कुराहरु पहिलोपटक भयो । जस्तो साफ वुमन्स च्याम्पियनसिप इतिहासमा नेपालले पहिलो पटक भुटानविरुद्ध गोल गर्न सकेन र जित निकाल्न सकेन ।

साफ वुमन्स च्याम्पियनसिपमा नेपालले अहिलेसम्म खेलेको यो पहिलो बराबरी हो । यसअघि ६ संस्करणमा गरी २७ खेल खेल्दा नेपालले २१ खेल जितेको थियो भने ६ खेलमा पराजित भएको थियो ।

यस्तै नेपालले साफ वुमन्स च्याम्पियनसिपको आफ्नो पहिलो खेलमा जित निकाल्न नसकेको पनि यो पहिलो पटक हो ।

घरेलु मैदानमा नेपालले लगातार तेस्रो पटक साफ च्याम्पियनसिप आयोजना गरेको हो । यसअघि सन् २०१९ मा विराटनगरमा भएको पाँचौ संस्करण र २०२२ मा काठमाडौंमै भएको छैटौं संस्करणमा नेपालले भुटानविरुद्ध सहज जित हात पारेको थियो ।

दुवै संस्करणमा नेपालले पहिलो खेल भुटानसँग नै खेलेको थियो र क्लिनसिट राखेको थियो । विराटनगरमा नेपालले पहिलो खेलमा भुटानलाई ३-० ले पराजित गर्दा २०२२ मा दशरथ रंगशालमै भुटानविरुद्ध पहिलो खेल खेल्दा नेपाल ४-० ले विजयी भएको थियो ।

साम्बाको अभाव

अर्को संयोग पनि छ । गोल मेसिन सावित्रा भण्डारी साम्बा पहिलोपटक भुटानविरुद्ध नखेल्दा नेपालले नतिजा आफ्नो पक्षमा पार्न सकेन ।

यसअघि साफमा नेपाल र भुटान चारपटक भेट हुँदा नेपालले चारै खेल जितेको थियो र २३ गोल गर्दा कुनै गोल खाएको थिएन । सबै चार खेलमा सावित्राले गोल गरेकी थिइन् ।

सन् २०१४ मा सावित्राले पाकिस्तानमा भएको साफमा भुटानविरुद्ध नै नेपालका लागि डेब्यु गरेकी थिइन् र त्यही खेलमा आफ्नो पहिलो अन्तर्राष्ट्रिय गोल गरेकी थिइन् । हाल फ्रान्समा इएनटी गुइग्याम्पबाट व्यावसायिक फुटबल खेलिरहेकी सावित्रा २० अक्टोबरमा मात्र नेपाल आउनेछिन् । नेपालका लागि उनले ४६ खेल खेल्दै सर्वाधिक ५३ गोल गरेकी थिइन् ।

तर, उनै सावित्रा नहुँदा नेपालले भुटानविरुद्ध निकै संघर्ष गर्नुपर्‍यो । सावित्रा विनाको नेपाली अट्याकिङ लाइन चुस्त रहन सकेन । नेपालले आधा दर्जन गोल गर्ने अवसर पाए पनि त्यसलाई सदुपयोग गर्न नसक्दा अंक बाँड्न बाध्य भयो ।

मुख्य प्रशिक्षक तामाङले पनि घुमाउरो पारामा साम्बा नहुँदा फिनिसिङ कमजोर भएको बताए । ‘अहिले गोल गर्न सकेनभन्दा पनि मुख्य कुरा हाम्रो गोल मेसिन सावित्रा भण्डारी हो ऊ हामीसँग छैन । टिममा भएको खेलाडीले चान्स पनि पायो तर टार्गेटमा हान्न सकेन,’ उनले भने ।

सावित्रा नहुँदा रश्मि कुमारी घिसिङ, सविता राना मगर र अमिसा कार्कीले फरवार्ड लाइन सम्हालेका थिए । तर, उनीहरुले पहिलो हाफमा पाएको अवसर सदुपयोग गर्न सकेनन् ।

प्रशिक्षक तामाङले दोस्रो हाफमा रेनुका नगरकोटे र सरु लिम्बुको स्थानमा रेखा पौडेल र दीपा शाहीलाई मैदान प्रवेश गराएपछि नेपालले केही आशा देखाएको थियो । भर्खरै यूएईको अबुधाबी कन्ट्री क्लबबाट एएफसी वुमन्स च्याम्पियन्स लिग खेलेर आएकी रेखाले पनि दोस्रो हाफमा केही अवसर बनाएकी थिइन् तर फिनसिङ चुस्त हुन सकेन ।

५२औं मिनेटमा दीपाको कर्नरमा रेखाले हानेको प्रहार भुटानी गोलकिपर संगीता मोन्गरले बचाइन् । खेलमा भुटानकी गोलकिपर संगीताले केही राम्रो बचाउसमेत गरिन् ।

नेपालका प्रशिक्षक राजेन्द्र तामाङले भने भुटानी किपरले राम्रो प्रदर्शन गरेको भन्दा पनि नेपाली फरवार्ड चुस्त हुन नसकेको बताइन् । तर, राम्रो प्रदर्शन गरेकैले भुटानी गोलकिपर संगीता प्लेअर अफ दि म्याच बनिन् ।

प्रशिक्षक तामाङले अब समूह चरणमा बाँकी रहेको दुई खेलमा राम्रो प्रदर्शन गर्ने बताए ।

– यस समाचारको श्रोत : Online Khabar हो ।