कर्मचारीमा निर्णय नगर्ने प्रवृत्ति बढ्यो : प्रधानमन्त्री

१६ फागुन, काठमाडौं । प्रधानमन्त्री पुष्पकमल दाहाल प्रचण्डले कर्मचारीवृत्तमा काम नगर्ने प्रवृत्ति बढेको गुनासो गरेका छन् । राष्ट्रिय सभाको राष्ट्रिय सरोकार तथा समन्वय समितिको बैठकमा बोल्दै प्रधानमन्त्रीले कतिपय अवस्थामा कर्मचारीहरुले निर्णय लिन हिच्किचाउने स्थिति देखा परेको बताए ।

‘निर्णय ग¥यो भने जोखिममा परिने हो कि भन्ने चिन्ता र भय कर्मचारीमा अलि बढेको छ ,’ उनले भने,‘बरु काम नगरेपछि त खतरा भएन भनेर काम नगर्ने विशेषतः सही नगर्ने प्रवृत्ति बढेको छ । यो प्रति सरकार गम्भीर भएको छ ।’ सरकारले यस्तो समस्यालाई समाधान गर्न प्रयास गरिरहेको उनले बताए ।

उनले आफूले सरकारको नेतृत्व गरेदेखि नै सकेसम्म छिटो संघीय निजामती ऐन ल्याउने र प्रदशेलाई बलियो बनाउने भन्ने रहेको दाबी गरे । ‘लामो सयम छलफल पनि भयो, गठबन्धन र प्रतिपक्षीससँग पनि छलफल भयो र त्यसले अन्तिम रुप पाएको छ,’ प्रधानमन्त्रीले भने,‘केही दिनभित्रै टुंगिन्छ र संघीय संसदमा पेश हुन्छ भन्ने हाम्रो विश्वास छ ।’

– यस समाचारको श्रोत : Online Khabar हो ।