कर बढ्ने हल्लाले पुस र माघमा आकासिएको ईभी आयात फागुनमा घट्यो

६ फागुन, काठमाडौं । चालु आर्थिक वर्ष (आव) २०८०/८१ सुरुवातबाट नै उच्च दरमा आइरहेको विद्युतीय गाडी (ईभी) फागुनमा भने कम आयात भएको छ ।

सरकारले चालु आव बीचमै ईभीमा कर बढाउन सक्ने चर्चा चल्दा पुस र माघमा ठूलो संख्यामा आयात भएको थियो । सरकारले बजेटको मध्यावधिक समीक्षामा भने ईभीको कर चलाएन ।

पुस र माघमा ठूलो संख्यामा ईभी आयात भएको र आगामी आवको बजेटअघि ईभीमा कर नबढ्ने निश्चित भएपछि फागुनमा भने आयात घटेको छ ।

सरकारले कर बढाउन सक्ने शंकाबीच पुसमा चालु आव लागेपछिकै उच्च १ हजार ४ सय २१ युनिट ईभी आयात भएको थियो । माघमा पनि १ हजार ५२ युनिट आयात भएको थियो ।

जुन चालु आव असोजमा आयात भएको १ हजार २ सय ३७ युनिट पछिको उच्च हो । पुस र माघमा कर बढ्न सक्ने शंकाबीच आयात बढे पनि फागुनमा आयात घटेर २ सय ७६ मा सीमित भएको भन्सार विभागको तथ्यांकले देखाउँछ ।

फागुनसम्मको तथ्यांकका आधारमा चालु आवमा प्रतिमहिना औसत ८ सय ८० युनिट आयात भएको देखिन्छ । जुन तथ्यांकभन्दा पुस र माघमा धेरै माथिको संख्यामा आयात भए पनि फागुनमा भने ईभी आयातमा गिरावट देखिएको हो ।

चालु आव आठ महिनामा १५ अर्ब ८१ करोड ९७ लाख ५९ हजार रुपैयाँ बराबरको ६ हजार ४ सय ३५ युनिट ईभी आयात भएको भन्सार विभागको तथ्यांकमा छ । त्यसबाट सरकारले ६ अर्ब ९९ करोड २६ लाख राजस्व संकलन गरेको छ ।

कुन क्षमताका कति ईभी आयात ?

चालु आव आठ महिनामा विद्युतीय कार, जीप र भ्यान ५ अर्ब १० करोड ४६ लाख २ हजार ७ सय ४६ रुपैयाँको आयात भएको भन्सार विभागको तथ्यांक छ ।

यस्तै ५१ देखि १०० किलोवाट क्षमताका १० अर्ब १८ करोड ५३ लाख रुपैयाँको ३ हजार ५ सय ९४ युनिट ईभी आयात भएको छ । १०१ देखि २०० किलोवाटसम्मका ३८ करोड ५० लाख बराबर ७५ युनिट आयात भएको छ ।

यस्तै २०० किलोवाट भन्दा बढी क्षमताको १४ करोड ४८ लाख रुपैयाँको २० युनिट ईभी आयात भएको भएको भन्सार विभागको तथ्यांक छ ।

यस्तै विद्युतीय ३ पाङ्ग्रे सवारीसाधन ६ हजार ५ सय ७२ युनिट आयात भएको छ । नेपालमा नै एसेम्बल गर्ने गरी विद्युतीय ३ पाङ्ग्रे सवारीसाधन नै १ हजार ७ सय ३१ युनिट आयात भएको भन्सार विभागले जनाएको छ ।

कुन महिनामा कति आए ईभी ?

फागुन : २७६
माघ : १०५२
पुस : १४२१
मंसिर : ८९९
कात्तिक : ६५२
असोज : १२३७
भदौ : ७८८
साउन : ११०

– यस समाचारको श्रोत : Online Khabar हो ।