कलिङ महोत्सवमा दक्षिण एसियाका ३०० लेखक सहभागी हुँदै
काठमाडौं । काठमाडौं कलिङ साहित्य महोत्सवको तेस्रो संस्करण भदौ २२ र २३ गते ललितपुरको होटल हिमालयमा आयोजना हुने भएको छ । दक्षिण एसियाका ३०० भन्दा बढी लेखक तथा विज्ञको उपस्थिति रहने महोत्सव उदघाटन पर्यटन तथा संस्कृतिमन्त्री बद्री पाण्डेले गर्ने आयोजकद्वारा जारी विज्ञप्तिमा जनाइएको छ ।
‘नेपाल : एसियाली कला, संस्कृति तथा साहित्यको प्रवेशद्वार’ थिम रहेको यस वर्षको महोत्सवले नेपालको समृद्ध सांस्कृतिक सम्पदा तथा दक्षिण एसियासँगको सम्बन्धलाई जोड विश्वास आयोजकले लिएका छन् ।
कला, साहित्य, सिनेमा, रंगमञ्च, संगीत, मिडिया, राजनीति लगायत समसामयिक विधामा छलफल तथा प्रस्तुति रहने महोत्सवमा नेपाल तथा भारतका कवि, लेखक, कलाकार तथा विज्ञहरु सहभागी हुँदै आएका छन् ।
मूलतः दक्षिण एसियाली लेखकको जमघट हुने महोत्सवमा यसपटक पनि नेपाल लगायत भारत, भुटान र श्रीलंकाबाट दर्जनौं सहभागी हुँदैछन् । नेपालबाट नेपाल प्रज्ञा प्रतिष्ठानका कुलपति भूपाल राई समेत सहभागी हुनेछन् ।
अभि सुवेदी, भुवन ढुंगाना लगायत साहित्यकारको पनि उपस्थिति हुने जनाइएको छ । भारतबाट उदय प्रकाश, कूटनीतिज्ञ लक्ष्मी मुर्डेश्वर, अर्थशास्त्री तथा लेखक सञ्जीव सान्याल, लेखक गुरुचरण दास जस्ता ख्यातिप्राप्त लेखक सहभागी हुने उल्लेख छ ।
आइतबार दोस्रो दिन बेलायती राजदूत रोब फेन सहभागी हुनेछन् । महोत्सवलाई लामो समयदेखि कायम आपसी सम्बन्धलाई उत्सवका रुपमा स्मरण गर्ने महोत्सव निर्देशक रश्मीरञ्जन परिदाले बताए ।
संस्थापक सदस्य रञ्जना निरौलाले महोत्सवको बारेमा उत्साह व्यक्त गर्दै भनिन्, ‘यस संस्करणले साहित्य, संगीत, कला र संस्कृतिमा रुचि राख्नेका लागि जीवनभरि सम्झनलायक अनुभव प्रदान गर्नेछ ।’
प्यानल छलफल र मुख्य सत्र बाहेक सहभागीले साहित्य, कला, संगीत, कविता र कथावाचनलाई केन्द्रमा राखेर हुने कार्यक्रमको पनि लाभ उठाउन सक्ने जनाइएको छ । उक्त अवसरमा ‘डिजिटल युगमा विकास र कूटनीतिबारे पुनर्विचार’, ‘एआईको युगमा साहित्यको भूमिका तथा भविष्य’, र ‘गोर्खा पहिचानः अवसर तथा चुनौती’जस्ता विषय समावेश छन् ।
दुई दिनको अवधिमा यसले ६० भन्दा बढी सत्र सञ्चालन हुने जनाइएको छ ।
– यस समाचारको श्रोत : Online Khabar हो ।