काभा यू-२० महिला भलिबलका लागि नेपाली टोली घोषणा
१९ असार, काठमाडौं । नेपाल भलिबल संघले माल्दिभ्समा आयोजना काभा यु–२० महिला भलिबल च्याम्पियनसिपमा सहभागी हुने नेपाली टोलीको घोषणा गरेको छ ।
च्याम्पियनसिपका लागि संघले १२ सदस्यीय अन्तिम टोली घोषणा गरेको हो ।
टोलीमा बागमती प्रदेशका ६, लुम्बिनी प्रदेशका ४ तथा सुदूरपश्चिम प्रदेश र गण्डकी प्रदेशबाट समान १–१ खेलाडी छनोट भएको नेपाल भलिबल संघका अध्यक्ष जितेन्द्रबहादुर चन्दले जानकारी दिए ।
प्रथम सहाना प्रधान स्मृति यु–१९ पुरुष तथा महिला भलिबल च्याम्पियनसिपमा गरेको प्रदर्शनका आधारमा संघले खेलाडी छनोट गरेको हो ।
बागमतीबाट जेनिशा विक, अनिशा मानन्धर, एन्जिला मानन्धर, निशा महर, सलिना बुढा मगर र भावना तामाङ रहेका छन् । यस्तै लुम्बिनीका निशा चौधरी, अनुषा चौधरी, मिना सुनार र आरती चौधरी छनोट भए । सुदूरपश्चिमबाट स्नेहा ठगुन्ना तथा गण्डकीबाट आशिका क्षेत्री छानिए ।
बागमती प्रदेशबाट खेलेका ६ खेलाडी नै न्यूडायमण्ड क्लबबाट खेल्दै आएका छन् । यस्तै लुम्बिनीका खेलाडी एभरेष्ट स्कुलबाट खेल्ने गर्छन् ।
गण्डकीका खेलाडी नेपाल पुलिस क्लब तथा सुदूरपश्चिमका खेलाडी त्रिभुवन आर्मीबाट खेल्दै आएका छन् ।
मुख्य प्रशिक्षकमा कुमार राई र सहायक प्रशिक्षकमा अर्जुन घिमिरे तथा व्यवस्थापकमा जुनु पुन मगर रहेका छन् ।
२० मा रहेका अधिकांश खेलाडीले सिनियर राष्ट्रिय प्रतियोगिता समेत खेलिसकेको अनुभव भएकाले नेपाली टिम राम्रो बनेको मुख्य प्रशिक्षक कुमार राईले जानकारी दिए ।
प्रतियोगिता माल्दिभ्सको मालेमा असार ३१ गतेदेखि साउन ९ गतेसम्म हुनेछ ।
– यस समाचारको श्रोत : Online Khabar हो ।