कार्दसियन दिदीबहिनी बिग बोसमा आउन लागेका हुन् ?
काठमाडौं । चर्चित भारतीय रियालिटी शो ‘बिग बोस’का निर्माता यसलाई धेरैभन्दा धेरै अन्तर्राष्ट्रिय दर्शकमाझ पुर्याउने कसरतमा छन् । यही मेसोमा निर्माताले जारी सिजनका लागि चर्चित अमेरिकी सेलिब्रेटी दिदीबहिनी किम कार्दसियन, काइली जेनर र केन्डल जेनरलाई शोमा आउन प्रस्ताव राखेको खबर छ ।
उनीहरुलाई ‘वाइल्ड कार्ड इन्ट्री’मार्फत शोमा ल्याउन प्रयास भइरहेको भारतीय सञ्चारमाध्यमले जनाएका छन् । यदि यो सम्झौताले आकार लिए डिसेम्बरमा तीनै दिदीबहिनी बिग बोसको हाउसमा प्रवेश गर्ने बलियो सम्भावना छ । अहिलेसम्म यसबारे निधो चाहिं भइसकेको छैन ।
चर्चित विश्व स्टार आउँदा यसले शोमा रौनकता थप्ने र अन्तर्राष्ट्रियरुपमा पनि टीआरपी बढ्ने आशा निर्माताको छ । स्रोतले टाइम्स अफ इन्डियासँग भनेको छ, ‘वास्तवमा बिग बोस यसको ड्रामाको लागि परिचित छ । तर यसपटक ग्ल्यामर पनि थपिने सम्भावना छ । यदि कार्दसियनलाई शोमा ल्याउँदा यसले भारतीय दर्शकमाझ रौनकता थप्ने विश्वास छ ।’
आधुनिक पप-संस्कृतिका प्रतीक मानिने कार्दसियन दिदीबहिनी दशकदेखि विश्वभर प्रभावशाली फेसन, व्यापार कौशल र ग्राउन्ड ब्रेकिङ रियालिटी शोका लागि चर्चित छन् । यसअघि बिग बोसले सिजन २ मा बेलायती टिभी पर्सनालिटी जेडी गुडीलाई पनि बोलाएको थियो ।
सिजन ४ मा पामेल एन्डर्सन जोडिएकी थिइन् । सन्नी लियोनी सिजन ५ मा जोडिएकी थिइन् । यदि कार्दसियन दिदीबहिनीले सहमति जनाए भने उनीहरु बिग बोसमा जोडिने सबैभन्दा हाइप्रोफाइल अन्तर्राष्ट्रिय सेलिब्रेटी बन्नेछन् ।
किम कार्दसियन केही महिनाअघि भारतमा आयोजित अनन्त अम्बानीको विवाहमा आएकी थिइन् । उनलाई महंगो मूल्यमा तिरेर ल्याइएको चर्चा त्यतिबेला चलेको थियो ।
– यस समाचारको श्रोत : Online Khabar हो ।
