सार्वभौम साख मूल्यांकन नतिजाबाट सीबीफीन उत्साहित
१० मंसिर, काठमाडौं । बैंक तथा वित्तीय संस्था परिसंघ नेपाल (सीबीफीन) ले सार्वभौम साख मूल्यांकन (सोभरेन क्रेडिट रेटिङ) ले नेपालको साख र विश्वसनीयता बढाएको बताएको छ ।
अन्तर्राष्ट्रिय एजेन्सी ‘फिच रेटिङ’ ले गरेको सार्वभौम साख मूल्यांकनमा नेपालले ‘बीबी माइनस’ रेटिङ प्राप्त गरेको छ । नेपााले रेटिङमा सन्तोषजनक नतिजाले उत्साहित बनाएको सीबीफीनले जनाएको छ ।
‘दक्षिण एसियाका अन्य मुलुकहरूमध्ये भारतभन्दा पछिको दोस्रो उच्च सार्वभौम साख मूल्यांकनको प्राप्तिले नेपालको साख र विश्वसनीयता बढाएको मात्र छैन, यसले अन्तर्राष्ट्रिय लगानीकर्ताका लागि नेपाल सुरक्षित, विश्वसनीय र भरपर्दो स्थान भएको प्रमाणित समेत गरेको छ,’ सीबीफीनले जारी गरेको विज्ञप्तिमा छ ।
मुलुकको अर्थतन्त्रका वाह्य सूचकहरू निकै बलियो स्थितिमा रहेको, पर्याप्त तरलतासहित न्यून ब्याजदर कायम हुँदाहुँदै पनि अपेक्षितरूपमा लगानी/कर्जा विस्तार हुन नसकि आर्थिक गतिविधिहरूले तीव्रता लिन नसकेको वर्तमान अवस्था रहेको सीबीफीनको विज्ञप्तिमा छ ।
यस्तो मूल्यांकनले समग्र निजी क्षेत्रमा समेत विश्वासको वातावरण सिर्जना गरेको र लगानी विस्तार, कर्जा प्रवाह तथा पूँजी परिचालनका लागि ठूलो अवसर सिर्जना गरेको सीबीफीनले जनाएको छ ।
साख मूल्यांकनले बैंक/वित्तीय संस्थाहरूलाई बाह्य जगतबाट सहुलियत दरमा ऋण ल्याउन, पुनर्बिमा कम्पनीले अन्य देशमा व्यवसाय विस्तार गर्न, धितोपत्र बजारलाई अन्तर्राष्ट्रियकरण गर्न, विदेशी बजारमा ऋण लिन/ऋणपत्र बिक्री गरी वित्तीय साधन जुटाउनका सञ्जीवनी बुटीको कार्य गर्ने विश्वास लिएको सीबीफीनको भनाइ छ ।
– यस समाचारको श्रोत : Online Khabar हो ।